Berdibek Saparbaev mektep túlekterine EKSPO kórmesiniń bıletin syılady
Bıyl 6 myńnan astam bala mektep bitirdi. Barlyǵy 467 bala «Altyn belgi» úmitkeri atanyp, emtıhandarda súrinbegen oqýshylardyń bári armandaryna qol jetkizdi. Al 301 oqýshy úzdik attestat aldy. Búgin respýblıkalyq, halyqaralyq jarystarǵa qatysyp, jeńimpaz atanǵan sol túlekterdi oblys ákimi Berdibek Saparbaev quttyqtap, bárine EKSPO kórmesine bılet syılady.
«Memleket basshysy Nursultan Nazarbaev kezekti Joldaýynda adam kapıtalyna úlken kóńil bólgen bolatyn. Árbir memlekettiń bolashaǵy, damýy onyń bilimdi, densaýlyǵy myqty, mádnıetti adamdarynda .Sizderge aqjol tileımiz. Bıyl elimiz úshin tarıhı jyl. Qazaqtyń tarıhynda tuńǵysh ret «EKSPO-2017» halyqaralyq kórmesi ótip jatyr. Alyp memleket basshylary, sheteldikter keldi. Sonyń bári Qazaqstan úshin, biz úshin úlken maqtanysh, abyroı, bedel»,- dedi Berdibek Saparbaev.
Búgin barlyǵy 200 úzdik túlek kezdesýge keldi. Olardyń arasynda aýyl balalary da bar. Shalqar aýdanyndaǵy №6 orta mekteptiń túlegi Aıken Nurpeıisov bul kúnge jetý úshin ádebı kitaptardy jıi oqyp, emtıhandarǵa jiti daıyndalǵanyn aıtty. «Altyn belgi» ıegeri ınjener bolýdy armandaıdy.
«Taıaýda Túrkistan qalasynda ótken ıAssaýı olımpıadasynda Qazaqstan tarıhy páni boıynsha birinshi oryndy ıelendim. Halyqaralyq saıystarǵa qatysyp, jeńimpaz atanyp júrmin. Búgin sol eńbegimiz elenip, úzdikter qataryna kirdik. Aldaǵy ýaqytta M. Tynyshbaev atyndaǵy ýnıversıtetke oqýǵa túsip, ınjener mamandyǵyn meńgergim keledi», - dedi ol.
Aıta keıik, EKSPO halyqaralyq kórmesine arnaıy bılet alǵan aqtóbelik túlekter bir aptadan soń UBT tapsyryp, keıin Astanany aralap kórýdi josparlap otyr.