Berdibek Saparbaev Qordaı aýdanynyń halqymen kezdesti

SORTÓBE. QazAqparat - Sortóbe aýylyndaǵy Mádenıet úıinde ótken aqsaqaldarmen kezdesý barysynda vıtse-premer jergilikti turǵyndardy sabyrǵa jáne túrli arandatýlarǵa ilespeýge shaqyrdy, dep jazady primeminister.kz.

« Bizdiń mindetimiz – turǵyndardyń qaýipsizdigi men quqyqtyq tártiptiń saqtalýyn qamtamasyz etý. Keshegi qaıǵyly jaǵdaı qaıtalanbaýy tıis. Ol úshin Memleket basshysynyń tapsyrmasymen óńirge Úkimet komıssııasy men quqyq qorǵaý organdarynyń qyzmetkerleri keldi. Biz tártip ornatamyz, sizderden sabyr saqtaýdy ótinemiz. Bizde barlyq qajetti quraldar men kúshter jetkilikti «, - dedi ol.

Vıtse-premerdiń aıtýynsha, kıkiljińdi týdyrǵandar men arandatýshylardy arnaıy operatıvtik tergeý toby anyqtaıtyn bolady, bul top bolǵan oqıǵanyń barlyq jaǵdaılaryna obektıvti tergeý júrgizedi.

« Biz árdaıym kelisimmen, tatý ómir súrdik. Mundaı jaǵdaı alǵash ret bolyp otyr. Jastar arasynda usaq kelispeýshilikter oryn alatyn, biraq menińshe, keshegi oqıǵaǵa úshinshi tarap qatysqan», - degen pikirin bildirdi aqsaqaldardyń bir i.

Óz kezeginde, Berdibek Saparbaev oqıǵanyń tek turmystyq sıpattaǵy kıkiljiń ekenin taǵy bir atap ótti.

« Biz bárimiz Qazaqstan Respýblıkasynyń azamattarymyz. Bul jerde eshqandaı ulttyq másele joq. Turmystyq kıkiljiń boldy, ony arandatýshylar paıdalanyp, basqa arnaǵa buryp jiberdi «, - dedi ol.

Sonymen qatar Úkimet komıssııasynyń músheleri BAQ ókilderine arnalǵan baspasóz konferentsııasyn ótkizdi.