Berdibek Saparbaev gaz baǵasyn retteýdi tapsyrdy
Jıynda oblys ákiminiń orynbasary Qaırat Bekenov suıyltylǵan gazben qamtýdyń aǵymdaǵy jaǵdaıy týraly málimdedi.
Sonymen suıyltylǵan munaı gazynyń kólemin bólý komıssııasynyń kvotasyna sáıkes tamyz aıynda óńir 7700 tonna gaz alatyn bolsa, onyń 6800 tonnasy - «SNPS-Aqtóbemunaıgaz» AQ-na, 900 tonnasy - «Qazaqoıl Aqtóbe» JShS-ne tıesili.
Qazirgi tańda oblysta 95 gaz quıý beketi jumys jasaıdy, onyń ishinde 53-i Aqtóbe qalasynda, 42-si aýdandarda. Sońǵy bes aıdyń ishinde 22 gaz quıý beketi ashyldy. Oblystyń gazǵa degen kún saıynǵy qajettiligi 240 tonnany quraıdy.
Q.Bekenovtyń aıtýynsha, aıdyń basynda gaz quıý beketterinde baıqalǵan suıyq gaz tapshylyǵy gazǵa ótken avtokólik quraldarynyń kóbeıýine baılanysty. Qazirgi tańda osyndaı avtokólikterdiń 34 225-i tirkelgen, ortasha qajettilik aıyna 7597 tonnany quraıdy. Osyǵan baılanysty jergilikti polıtsııa qyzmetine gaz qurylǵysy bar tirkelmegen avtokólikterdi anyqtaý boıynsha reıd júrgizý usynyldy. Bul suıyq gazǵa degen qajettilikti naqty esepteýge múmkindik beredi.
Oblys ákimi Berdibek Saparbaev júrgizilgen saraptamaǵa kóńili kónshimeı, sonymen qatar, áleýmettik gaz baǵasyn belgileýge qatysty saýaldy da kóterdi.
«Aı bastalsa boldy, bizde másele shyǵyp qalady. Halyq gaz quıý beketterinde gazdyń joqtyǵyna, kezekke turatyndaryna shaǵynady. Demek, sizder jumysty durys retteı almaǵansyzdar jáne osy máseleni sheshýde aralaryńyzda ózara áreket etý joq,-dedi oblys ákimi basqarma basshylaryna, sonymen qatar, otyndy jetkizýmen jáne satýmen aınalysatyn kompanııa ókilderine tıgizip aıtqan sózinde.
Sondaı-aq ákim baǵa belgileýge baılanysty másele kóterdi.
«Aǵymdaǵy jyldyń 15 tamyzynan bastap suıyltylǵan gazdyń bir lıtri Aqtóbe qalasynda 49 teńgeden, oblys aýdandarynda 51 teńgeden satylady. Baǵa ósti, onda nege shyǵyndar, salyq aýdarymdary, gaz quıý beketi jumysshylarynyń eńbekaqy mólsheri sol kúıinde? Baǵanyń ósýine negiz bolý qajet»,- dedi B. Saparbaev.
Suıyltylǵan gazdy jetkizýshilerdiń Aqtóbe oblysy boıynsha assosatsıatsııasy tóraǵasynyń orynbasary Altynaı Muhanova qazirgi tańda 2920 tonna suıyltylǵan gaz alynyp, satylǵandyǵyn, tamyz aıynyń sońyna deıin 4780 tonnasy jetkiziletindigin atap ótti. Suıyltylǵan gazdy bólýmen jáne satýmen gaz quıý beketteri ıeleriniń arasynan shyqqan bastamashyl top músheleri, memlekettik organdar qyzmetkerleri aınalysady.
«Eger bizde gaz qory bolmasa, biz atalmysh máseleni sheshe almaımyz. Budan ózge, barlyq gaz quıý beketterindegi gazdyń qoldaǵy mólsherin, bosatylýy men baǵasyn kórsetetin málimetterdiń elektrondy bazasyn qurý qajet. Esep júrgizý júıesimen jumys isteý kerek. Áleýmettik gaz ornymen ketýi tıis, barlyǵy ashyq ári aıqyn jumys jasaýlary qajet»,- dep qatań tapsyrdy ákim.
Jıyn sońynda Berdibek Saparbaev atalmysh máseleni on kúnniń ishinde zerttep, otyn qajettiligi boıynsha taldaý jasaýdy, gaz qurylǵysy bar mashınalardy tirkeýdi, osyndaı jaǵdaıǵa keleside jol bermeýdi tapsyrdy.