Berdibek Saparbaev: Elimizde 12 mln sharshy metr turǵyn úı paıdalanýǵa beriledi
Dostyq úıindegi jıynǵa 400-den astam turǵyn jınalǵan. Munda óńir belsendileri, aqsaqaldar, jastar bar.
Aldymen, sóz alǵan Berdibek Saparbaev Nur-Sultan qalasynan kelgen delegatsııany tanystyryp, eldiń damý kórsetkishteri men alǵa qoıǵan maqsattardy aıtyp berdi.
«Qurmetti mańǵystaýlyqtar! Bizdiń eń negizi mindetimiz - berilgen tapsyrmany der kezinde oryndaý. Qazaqstan ekonomıkasy jylyna 4%-ǵa ósý kerek. Ekonomıka damysa, bıznes qurylymdary artyp, ónerkásipter ashylyp, halyqtyń jaǵdaıy jaqsarady. Eldiń ekonomıkasyna 10 trln teńgeden astam qarjy tartyldy. Jumys oryndary ashylyp, jumyssyzdyq deńgeıi 4,8% boldy. Endigi maqsatymyz - 12 mln sharshy metr úıdi paıdalanýǵa berý kerek. Eńbek jáne jumyspen qamtý boıynsha 100 jańa kásiptiń atlasy ázirlenýde. Qyzmetti proaktıvti kórsetý damytýǵa kóńil bólinbek», - dedi Berdibek Saparbaev.
Berdibek Mashbekuly, bıyl jasalǵan eń úlken jumys, ataýly áleýmettik kómek ekenin atap ótti. Bul maqsatta 245 mlrd.tg jumsalǵan. Endi jańa ózgeristerdi halyqtyń arasyna keńinen túsindirý kerek dep tapsyrdy.
Jıylǵandar da óz saýaldaryn joldady. Qoǵamdyq keńes múshesi Aıat Súgirbaı kópbalaly otbasylardyń máselesin aıtyp ótti.
«Turǵyn-úımen qamtamasyz etý qıyndaý bolyp tur. »Baqytty otbasy« sııaqty baǵdarlama bar, biraq tıimsizdeý, mysaly ekinshi deńgeıli banktiń súzgisinen óte almaıdy. Basqa balama baǵdarlama kerek. Budan bólek, oblysta jyl saıyn múgedek bala kóbeıýde. Urpaqtyń sapasyn arttyrýǵa jumystansaq jaqsy bolar edi», - dedi ol. Sondaı-aq, jasóspirim qyzdardyń erte júktiligi, otbasylardyń ajyrasý faktileri týraly aıtty.
Berdibek Saparbaev turǵynǵa óz jaýabynda bank tártibi ózgertilmeıtinin aıtty.
«7 myń kópbalaly otbasy úı aldy. Myńdaǵan kásipkerler kómektesti. Banktiń tártibin ózgerte almaımyz. Oǵan zań boıynsha qaraý kerek. Múgedek boıynsha ulttyq jospardy bekittik. Respýblıka boıynsha 80 myń múgedek bala bar. Endi ońaltý ortalyqtaryn salý kerek. Qazir 11 oblys ortalyǵynda joq»,-dedi Berdibek Saparbaev.
Sondaı-aq turǵyndar oblys ekologııasynyń nasharlyǵyn, jumys oryndarynyń qysqarýy, densaýlyq salasyndaǵy qıyndyqtar týraly saýaldar qoıdy.
Eske sala ketsek, QR Premer-mınıstriniń orynbasary Berdibek Saparbaev bastaǵan Úkimettiń jumys toby Mańǵystaý oblysyna jumys saparmen keldi.
Jumys tobynyń quramyna Úkimettiń áleýmettik blogynyń basshylary kiredi: bilim jáne ǵylym, densaýlyq saqtaý, eńbek jáne áleýmettik qorǵaý, mádenıet jáne sport, aqparattyq jáne qoǵamdyq damý mınıstrlikteri, sonymen qatar, Qazaqstannyń Kásipodaq federatsııasy, «Atameken» UKP jáne Áleýmettik medıtsınalyq saqtandyrý qory bar.