Berdibek Saparbaev dinı joralǵylarda ysyrapshylyq jasamaýǵa shaqyrdy

TARAZ. QazAqparat – Jambyl oblysynyń ákimi Berdibek Saparbaev ımamdarmen kezdesip, óńirdegi dinı ahýaldy talqylady, dep habarlaıdy QazAqparat oblys ákimdiginiń resmı saıtyna silteme jasap.

Aımaq basshysy atap ótkendeı, qazirgi tańda oblysta 350-den astam dinı birlestik jumys isteıdi, olardyń basym kópshiligi meshitter. Kez kelgen ilim beıbitshilik pen jaqsylyq ıdeıalaryn ýaǵyzdaıdy desek, osy oraıda jergilikti din qaıratkerleri de Qazaqstan halqynyń birligin nyǵaıtýǵa óz úlesterin qosýy tıis. Senim ıeleriniń, ásirese jastar arasynda sabyrlyq pen toleranttylyq negizderin oqytýǵa den qoıý kerek.

Qazaqstan – zaıyrly memleket. Bul turǵydan kelgende dinı nysandardy jeke qarajat esebinen salýǵa eshkim qarsy emestigi, alaıda basty mindet retinde – balalarǵa sapaly bilim berý mańyzdylyǵy aıtyldy. Sondaı-aq, memlekettik tildi mindetti túrde oqytý, ony qyzmet barysynda paıdalaný jaıy da nazarǵa alyndy. Imamdardyń ár sózi kelýshiler úshin úlken ról atqarady desek, olardyń daıyndyq deńgeıi men ózekti máseleleri, shet elderden jetkiziletin dinı ádebıetterdiń mazmunyna asa mán berý máselesine kóńil bólindi.

Oblystyq din isteri basqarmasynyń basshysy Jangeldi Omarov QMDB-men birlesip elimizde tyıym salynǵan dinı uıymdar men aǵymdardyń jolyn kesý boıynsha aldyn alý jumystary júrgizilip jatqanyn atap ótti.

Búginde qoǵamda dinniń yqpaly kún sanap artýda desek, oǵan dálel retinde juma namazǵa keletinderdiń sanynyń oblys boıynsha 35 myńnan 37 myńǵa kóbeıgenin jáne olardyń basym bóligi jastar ekenin aıtýǵa bolady.

Basqosý barysynda oblys ákimi basqarma basshysynyń baıandamasyn ortasynan toqtatyp, jıynnyń kún tártibindegi negizgi máselesi men maqsatyn eske saldy. Qalyptasyp otyrǵan jaǵdaıdy jaqsartý úshin vedomstvo qandaı qadamdar jasaı alatyndyǵyn surady.

Mektepterde onlaın-dárister ótkizilip, teologtar men jýrnalısterden arnaıy toptar quryldy. Qordaı aýdanynda ımamdar úshin qazaq tilin úıretý kýrstary ashylǵan. Aldaǵy ýaqytta onda basqarý bólimin qurý josparlanyp otyr.

Oblys basshysy óńir boıynsha 70 teologtyń eńbek etetinine kúmán keltirip, bir aımaq qana emes, tipti el kóleminde mundaı mamandardyń sanynyń bolýy ekitalaı ekendigin alǵa tartty.

Sondaı-aq, basqarma aýyldaǵy meshit ımamdarynyń ne týraly ýaǵyz aıtatyndyǵyn qadaǵalamaıtyndyǵyn, din kóshbasshylarynyń kózqarastary boıynsha zerdeleý sharalaryn uıymdastyrmaıtyndyǵyna kóńil bóldi. Memlekettik aqparattyq saıasat aıasynda jumystardyń álsizdigin tilge tıek etti.

Jambyl oblysynyń bas ımamy Qanat Jumaǵulov din qyzmetkerleriniń aldyna jańa mindetter qoıylyp otyrǵanyn aıtyp, ol boıynsha el musylmandary dinı basqarmasynyń saıtynda tanysýǵa bolatyndyǵyn jetkizdi. Qazaqstan musylmandary dinı tuǵyrnamasynyń «Jeti rýhanı qazyq» qaǵıdattaryn kelýshiler arasynda nasıhattap, olardy ózara qarym-qatynasta qoldaný qajettigine toqtaldy.

Berdibek Saparbaev dinı joralǵylardy ótkizý kezinde ysyrapshyldyqtan bas tartyp, qarapaıymdylyq pen qaıyrymdylyq sharalaryna kóńil bólýge shaqyrdy. Sondaı-aq, ımamdar meshitterde aıtylǵan árbir sóz úshin jaýapkershilikti sezinip, qoǵamdaǵy beıbitshilik pen tynyshtyqty saqtaýǵa úlesterin qosý qajettigin basa aıtty.