Berdibek Saparbaev «Beıbitshilik qabyrǵasynyń» maǵynasyn aıtyp berdi

ASTANA. QazAqparat - Aqtóbe oblysynyń ákimi Berdibek Saparbaev ózi basqaryp otyrǵan óńirdiń elordaǵa tartýy - «Beıbitshilik qabyrǵasy» monýmentiniń maǵynasy týraly aıtyp berdi, dep habarlaıdy QazAqparat tilshisi.

«Ózderińiz bilesizder, Astananyń 20 jyldyǵyna baılanysty Memleket basshysy óńirlerdiń árqaısysy óziniń syılyǵyn Astanaǵa tartý etýi jóninde tapsyrma bergen bolatyn. Biz Elbasynyń qazirgi tańda dúnıejúzinde beıbitshilikke baılanysty júrgizip otyrǵan saıasatyn eskere kele, onyń ústine búgin 29 tamyz - ıadrolyq synaqtarǵa qarsy kún bolǵandyqtan, «Beıbitshilik qabyrǵasyn» syıǵa tartyp otyrmyz. Mundaǵy maqsatymyz - «Beıbitshilik qabyrǵasy» arqyly Elbasynyń dúnıejúzinde beıbitshilikti saqtaý jóninde júrgizip otyrǵan saıasatyn kórsetý bolyp tabylady», - dedi Berdibek Saparbaev.

Ákimniń aıtýynsha, qabyrǵada kólemi 611 sharshy metrlik LED-ekran tur. Onda 27 jyldaǵy Elbasy Nursultan Nazarbaevtyń beıbitshilik jolynda júrgizgen barlyq jumystaryn, sharalaryn kórýge bolady.

«Keleshekte ol ekrannan Astanada bolyp jatqan barlyq jumystardy kórsetýge bolady. Ekinshisi qabyrǵa - ıadrolyq jarylysty toqtatý qabyrǵasy bolyp esepteledi. Japyraqtyń ne ekenin bilesizder. Ol - beıbitshiliktiń belgisi. Qabyrǵada «Beıbitshilik» degen sóz 51 tilge aýdarylyp jazylǵan. ıAǵnı, onyń maǵynasy - álemde beıbitshilik bolý úshin oǵan barlyq memleketteri, ulttar óziniń úlesin qosý kerek», - deıdi ol.

Eske sala ketsek, Aqtóbe oblysy Astananyń 20 jyldyǵyna «Beıbitshilik qabyrǵasy» monýmentin syıǵa tartty. Monýmenttiń búgin ótken ashylý saltanatyna Memleket basshysy Nursultan Nazarbaev qatysty.