Berdibek Saparbaev bazarlarda sanıtarlyq talaptardy qatań saqtaýdy talap etti

TARAZ. QazAqparat – Jambyl oblysynyń ákimi Berdibek Saparbaev Tarazdaǵy birqatar saýda oryndarynyń jumysymen tanysyp, sanıtarlyq talaptardyń saqtalý barysyn tekserdi, dep habarlaıdy QazAqparat oblys ákimdiginiń resmı saıtyna silteme jasap.

Aımaq basshysy barǵan alǵashqy nysan qalanyń shyǵys shetinde ornalasqan «Aýyl Bereke» bazary boldy. Onda oblys ákimi azyq-túlik taýarlarynyń assortımentimen, sapasy jáne baǵasymen tanysyp, satýshylar men tutynýshylardy ángimege tartty. Búgingi tańda bazardyń jemis-kókónisterdiń, qurylys materıaldary men aýylsharýashylyq ónimderiniń kóterme saýda sektory jumys isteýde. Karantınge baılanysty azyq-túlik emes taýarlar saýda bólikteri jabylǵan.

Bazar aýmaǵyn sholyp shyqqan aımaq basshysy birqatar mańyzdy máselelerge toqtaldy.

- Buǵan deıin men bazar aýmaǵyn retke keltirýdi, saýda oryndaryn jaqsartýdy, yńǵaıly jaǵdaı jasaý máselelerine nazar aýdarýdy tapsyrǵan bolatynmyn. Alaıda, bul nusqaýlar tolyǵymen oryndalmaǵan. Jaıly saýda pavılondary joq. Keıbir satýshylar jerde saýda jasap otyr. Kólik quraldarynyń bazardaǵy retsiz qozǵalysy órt qaýpin týdyrady, - dedi ol.

Sanıtarlyq-epıdemıologııalyq talaptardy saqtalýy da oıdaǵydaı emes. Satýshylar da, satyp alýshylar da betperde kımeıdi, adamdar arasyndaǵy áleýmettik araqashyqtyq saqtalmaıtynyn kórip otyrmyz.

- Naryq qyzmetkerleri azyq-túlik emes sektordaǵy jumysty qaıta bastaýdy suraýda. Alaıda, bazar ákimshiligi qajetti sanıtarlyq talaptardyń saqtalýyn qamtamasyz ete almaı otyr. Tıisti sharalar qabyldańyzdar, sodan keıin ǵana bazardyń tolyq ashý týraly aıtýǵa bolady. Pandemııa kezinde bizdiń azamattarymyzdyń densaýlyǵyna qatysty qaýipsizdik sharalaryn elemeýge jol berilmeıdi, - dedi Berdibek Saparbaev bazar basshylyǵyna.

Sondaı-aq, Taraz qalasyndaǵy aımaq basshysy «Ortalyq» jáne «Atakent» bazarlaryn at basyn buryp, oblys ortalyǵyndaǵy demalys saıabaqtarynyń aýmaǵyn aralap kórdi.