Berdibek Saparbaev: Azyq-túlik baǵasynyń negizsiz ósýine jol bermeý qajet
Densaýlyq saqtaý basqarmasynyń basshysy Marat Jumanqulovtyń aıtýynsha, óńirde COVID-19 vırýsymen aýyrǵan adamdardyń sany buǵan deıin tirkelgen 3 jaǵdaımen qalyp otyr.
Baıandamashy quqyq qorǵaý organdarynan azamattardyń dárigerlerdiń zańdy talaptaryna baǵynbaýyna qatysty máselelerdi sheshýge atsalysýyn surandy. Mundaı oqıǵa Qordaı aýdanynda oryn alǵan. Ondaǵy turǵyn tek uzaq áńgimelesýden keıin ǵana aýrýhanaǵa barýǵa kónip, qajetti taldaýlardy tapsyrǵan. Taldaý nátıjesi teris bolyp shyqqan, eger jaǵdaı basqasha bolǵanda, onda másele tipti kúrdelene túsýi múmkin edi.
Shtab basshysy Berdibek Saparbaev bul jaıtqa beı-jaı qaramaı, oblystyq polıtsııa departamenti bastyǵynyń orynbasary Temirbek Orazymbetovke naqty tapsyrmalar júktedi. Ózine de, aınalasyndaǵylarǵa da qaýip tóndirgen, tótenshe jaǵdaı rejımin buzǵan adamdarǵa qatysty zańdy jazalaý sharalaryn qoldanýdyń mańyzdylyǵyn basa aıtty.
Sondaı-aq, jıynda kásipkerlik jáne ındýstrıaldy-ınnovatsııalyq damý basqarmasy basshysynyń mindetin atqarýshy Jandáýlet Kenjebekovtiń azyq-túlik taýarlarynyń baǵasyn ustap turý jónindegi jumystarynyń nátıjesizdigin oblys basshysy synǵa aldy.
- Búgingi tańda halyqty alańdatyp otyrǵan basty máselelerdiń biri – baǵa turaqsyzdyǵy. Siz ózińiz eki apta ishinde negizgi azyq-túlik taýarlarynyń qunynyń ne sebepti ósip otyrǵanyna taldaý júrgizip kórdińizbe? Baǵanyń ósýi kóptegen saýda jelilerinde baıqalýda. Basqa ónimder týraly aıtpaǵannyn ózinde, eń bolmaǵanda tuz baǵasyn ustap tura almaımyz. Qurylǵan mobıldik toptardyń jumysy sátsiz júrgizildi. Biz mundaı jaǵdaıda jumys oryndaryn saqtap, baǵanyń sharyqtaýyna jol bermeýge tıispiz, - dedi oblys ákimi.
Aımaq basshysy óziniń orynbasary Nurjan Kalenderovke prokýratýra jáne monopolııaǵa qarsy qyzmet qyzmetkerlerimen birge áleýmettik mańyzy bar azyq-túlik taýarlaryna baǵanyń kóterilý sebebin tekserýdi tapsyrdy.