Berdibek Saparbaev: Azyq-túlik baǵasynyń negizsiz ósýine jol bermeý qajet
«Memleket basshysy el aýmaǵynda koronavırýsty taratýǵa jol bermeý jóninde naqty tapsyrmalar berdi. Atap aıtqanda, buqaralyq, mádenı jáne sporttyq is-sharalar, konferentsııalar men kórmeler ótkizýge ýaqytsha tyıym salynady. Saýda ortalyqtaryn, bazarlardy, qoǵamdyq tamaqtaný nysandaryn, vokzaldar men áýejaılardy qosa alǵanda, adamdar jınalatyn barlyq jerlerde sanıtarlyq rejim kúsheıtildi. Bizdiń mindetimiz –Prezıdent tapsyrmalarynyń oryndalýyn qamtamasyz etý, halyq arasynda dúrligýge jol bermeý», - dedi ol.
Basqosýda oblystyq taýarlar men qyzmetterdiń sapasy men qaýipsizdigin baqylaý departamentiniń basshysy Berik Jarqynbekov júrgizilgen aldyn alý jumystary týraly baıandady. Oblys ákimi aqparattyq-túsindirý jumystarynyń álsizdigin atap ótti.
«Siz jergilikti jerlerde halyq arasynda túsindirý jumystaryn júrgizýińiz kerek. Telearnalarda jáne adamdar kóp jınalatyn jerlerde beınerolıkter kórsetilip, baspasóz betinde tıisti materıaldardy jarııalaý kerek. Medıtsınalyq maskalardyń tapshylyǵyna shaǵymdar bar. Oblystyń bul baǵytta óz zaýyty bolǵanymen, óńirdi qarapaıym medıtsınalyq buıymdarmen qamtamasyz ete almaýda. Departament tarapynan baqylaý jumystary nashar júrgizilýde», - dedi aımaq basshysy.
Oblystyq densaýlyq saqtaý basqarmasynyń basshysy Marat Jumanqulovtyń aıtýynsha, bes medıtsınalyq mekemeniń bazasynda karantınde ustaý jáne emdeý úshin 1040 tósek-oryn daıyndalǵan. Bekitilgen algorıtmge sáıkes emdeý mekemeleri qajetti mamandarmen, medıtsınalyq jabdyqtarmen jáne dári-dármektermen qamtamasyz etilgen.
Oblys ákimi adamdar kóp jınalatyn jerlerde, qoǵamdyq tamaqtaný oryndarynda, saýda ortalyqtary men memlekettik mekemelerde dezınfektsııa deńgeıin kúsheıtýdi tapsyrdy. Sondaı-aq, sanıtarlyq-epıdemıologııalyq normalardyń saqtalýyn baqylaýdy úkimettik emes uıymdardyń ókilderi, ardagerler men volonterler tartylǵan mobıldi jumys toby júrgizetin bolady.
Sondaı-aq Berdibek Saparbaev koronavırýs qaýpine baılanysty turǵyndar arasynda merekelik is-sharalardy ótkizýden bas tartý, kóńil kóterý jáne oıyn-saýyq mekemelerine múmkindiginshe barmaýdyń mańyzdylyǵy týraly túsindirý jumystaryn júrgizýdi tapsyrdy.
Budan basqa, shekara mańyndaǵy pýnktterde baqylaýdy kúsheıtý, al memlekettik organdarda ótkiziletin keńesterdiń sany men olardyń qatysýshylarynyń sanyn azaıtý qajettigi aıtyldy.
Azyq-túlik qaýipsizdigin qamtamasyz etýge nazar aýdartqan Berdibek Saparbaev óńirde keıbir áleýmettik mańyzy bar azyq-túlik taýarlar baǵasynyń ósýi baıqalatynyn atap ótti.
«Ótken keńeste jaýapty basshylarǵa áleýmettik mańyzy bar taýarlardyń baǵasyna kúndelikti monıtorıng júrgizý, olardyń negizsiz ósýine jol bermeý týraly tapsyrma berilgen bolatyn. Búgingi tańda olardyń baǵasynyń ósýine eshqandaı negiz joq. Alaıda qolda bar aqparat boıynsha keıbir saýda obektilerinde kúrish, qant jáne áleýmettik nan baǵasy qymbattaǵan. Bul osy baǵyttaǵy jumystyń tıisti deńgeıde júrgizilmegendigin kórsetedi», - dedi ol.
Osyǵan baılanysty Berdibek Saparbaev óziniń orynbasarlary Murathan Shúkeev pen Nurjan Qalenderovke saýda núkteleriniń, bazarlar men kókónis qoımalarynyń jumysyn arnaıy tekserýdi, áleýmettik mańyzy bar ónimderdiń qymbattaýy men tapshylyǵyna jol bermeýdi nyqtap tapsyrdy. Oblys turǵyndary arasynda tıisti túsindirý jumystaryn júrgizý qajettigi aıtyldy.