Berdibek Saparbaev azyq-túlik baǵasyn turaqtandyrýdy tapsyrdy
Jergilikti ákimdik basshylary óz aýmaqtaryndaǵy jaǵdaılar týraly baıandady. Búgingi tańda barlyq aýdandar men Taraz qalalary boıynsha blokposttar jumys isteýde. Eldi mekenderde ǵımarattardy, kóp páterli úılerdiń kireberisterin, kóshelerdi, qoǵamdyq paıdalaný oryndaryn dezınfektsııalaý jumystary josparly túrde júrgizilýde. Jergilikti bılik áleýmettik mańyzy bar taýarlardyń baǵasyn ustap turý boıynsha tıisti sharalar qabyldap, áleýmettik máselelerdi sheshýde.
«Osy baǵyttaǵy jumystardy jalǵastyrý kerek. Qalyptasqan jaǵdaı bizden naqty áreketterdi, týyndaǵan máselelerge jedel jaýap qatýdy talap etip otyr. Búginde azyq-túlik taýarlary baǵasynyń turaqtylyǵyn qamtamasyz etý kerek. Bul asa mańyzdy. Ol úshin Almaty, Túrkistan, Qyzylorda oblystarynyń tasymaldaýshýlarymen baılanys ornatý, jergilikti turaqtandyrý qorynyń múmkindikterin paıdalaný qajet», - dep atap ótti oblys ákimi.
Berdibek Saparbaev aýdandar men Taraz qalasynyń ákimderin turǵyndarǵa barynsha qamqorlyq kórsetýge, olardyń suranystary men usynystaryna muqııat nazar aýdarýǵa shaqyrdy.
Sondaı-aq, aımaq basshysy qajet bolǵan jaǵdaıda, zeınetaqy men járdemaqyny alýshylardyń turǵylyqty jeri boıynsha jetkizip berýdi qamtamasyz etý kerektigin alǵa tartty. Bul maqsatqa eriktilerdi belsendi túrde tartý qajettigi aıtyldy.
Qoǵamdyq oryndardy dezınfektsııalaý jumystaryn jalǵastyrý kerek. Bul rette karantınnen keıingi kezeńde atqarylatyn jumystardyń negizin qazirden túzip, qurylys nysandaryn, kadrlarmen jáne materıaldarmen qamtý barysyn anyqtap qoıý qajet. Jyl sońyna deıin aýqymdy qurylys-montaj jumystaryn júzege asyrý mindeti tur desek, bul oraıda bıýdjetten bólingen qomaqty qarajatty tolyǵymen ıgerý mańyzdylyǵyna kóńil bólindi.
Qajy MURAT