Berdibek Saparbaev ataýly áleýmettik kómekti alý tártibin túsindirdi

KÓKShETAÝ. QazAqparat - Úkimet basshysynyń orynbasary Gúlshara Ábdihalyqova bastaǵan jumys toby Aqmola oblysynda boldy. Óńirdegi aýyl jáne aýdan ákimderimen kezdesken top múshesi, QR Eńbek jáne áleýmettik qorǵaý mınıstri Berdibek Saparbaev bıylǵy jyldyń 1 sáýirinen bastap beriletin ataýly kómekti alý tártibi týraly aıtyp berdi, dep habarlaıdy QazAqparat tilshisi.

Mınıstrdiń aıtýynsha, kóp balaly otbasylary men múgedekterge bıylǵy jyldyń 1 shildesinen bastap beriledi dep josparlanǵan ataýly áleýmettik kómekti berý tártibi birshama ózgerdi. Memleket basshysynyń bastamasymen ataýly kómek 1 sáýirden bastap beriledi.

«2018 jyly ataýly kómek kólemi 40-50 paıyzǵa ósse, bıylǵy jyly 70 paıyzǵa kóteriledi. Sóıtip, endigi arada kópbalaly otbasylarǵa beriletin járdemaqy 14849 teńgeden 20789 teńgege jetip otyr», dedi Berdibek Saparbaev.

Mınıstrdiń aıtýynsha, osyndaı kóbeıtilgen ataýly kómekti respýblıka boıynsha 830 myń adam, al Aqmola oblysynda 18651 adam alýǵa tıis.

«Ataýly kómek alýǵa qatysty jurtshylyqty tolǵandyratyn jáne oryndy renishin týǵyzatyn jaı-quzyrly organdardyń qajetsiz qujattardy talap etip, adamdardy áýre-sarsańǵa salatyny belgili. Sol sebepti, endigi arada járdemaqy alý úshin jalǵyz ǵana qujat - jeke basy kýáligi ǵana talap etiledi. Ataýly áleýmettik kómek alýǵa qajetti basqa barlyq qujattar elektrondyq nusqada halyqqa qyzmet kórsetý ortalyqtary arqyly qabyldady», - dedi Berdibek Saparbaev.