Berdibek Saparbaev áleýmettik jelide akkaýnt ashty

TARAZ. QazAqparat - Jambyl oblysynyń ákimi Berdibek Saparbaev tanymal áleýmettik jelilerde jeke paraqshasyn ashty, dep habarlaıdy QazAqparat tilshisi.

Facebook, Instagram áleýmettik jelicinde paraqshasyn ashqan B.Saparbaev halyqpen erkin dıalog qurýǵa daıyn ekendigin jetkizdi. Bul týraly oblys ákiminiń baspasóz qyzmeti habarlady.

«Halyqpen tıimdi baılanys ornatý – el basshylyǵynyń qoıyp otyrǵan basty mindetteriniń biri. Osy oraıda, men úshin oblys turǵyndaryn tolǵandyratyn ózekti máselelerden habardar bolyp otyrý jáne soǵan oraı jedel áreket ete bilý mańyzdy. Sizdermen ashyq dıalog ornatý maqsatynda áleýmettik jelilerdegi jeke paraqshalarymdy ashqandy jón kórdim.

Ózderińizben óńirdegi ózekti máselelerdi sheshý jolynda jan-jaqty pikir almasa otyryp, syndarly qoǵamdyq dıalog ornata alatynymyzǵa senimdimin», - dep jazdy ákim alǵashqy jazbasynda.

Ákimniń aıtýynsha, ortaq maqsat – ómir sapasynyń joǵary standarttaryna qol jetkizý, Jambyl óńirin ómir súrýge jáne jumys isteýge barynsha qolaıly mekenge aınaldyrý.