Berdibek Saparbaev Aqtóbe oblysynyń qurmetti azamaty atandy

AQTÓBE. QazAqparat – Aqtóbe oblystyq máslıhatynyń depýtattary birneshe adamǵa «Aqtóbe oblysynyń qurmetti azamaty» ataǵyn berý usynysyn quptady. Olardyń arasynda memleket jáne qoǵam qaıratkeri Berdibek Saparbaev ta bar, dep habarlaıdy QazAqparat tilshisi.

Búgin Aqtóbe oblysynyń bıýdjeti naqtylandy. Oblystyq ekonomıka jáne bıýdjettik josparlaý basqarmasynyń basshysy Nurjan Maqsatovtyń aıtýynsha, 38,8 mlrd teńge qurylysqa, jóndeý jumystaryna, eldi mekenderde gaz, sý qubyry jelilerin júrgizýge jáne basqa da mańyzdy maqsattarǵa baǵyttaldy. Oblys ákimi Eraly Toǵjanov qarjy birinshi kezekte halyqty tolǵandyratyn áleýmettik máselelerdi sheshýge baǵyttalatynyn atap ótti.

«Úkimettiń keńeıtilgen otyrysynda Memleket basshysy eldi mekenderdi áleýmettik-ekonomıkalyq damytý, olardy abattandyrý boıynsha birqatar mindetter qoıdy. Biz alǵa qoıǵan maqsattarǵa jetý úshin birlesip jumys isteýimiz kerek», - dep atap ótti Eraly Toǵjanov.

Sondaı-aq, oblystyq máslıhat sessııasy barysynda depýtattar memleket qaıratkeri Berdibek Saparbaevqa, aýyl sharýashylyǵy ǵylymdarynyń kandıdaty Serikbaı Rzabaevqa, medıtsına professory Naǵashybaı Aqataevqa jáne oblystyq ardagerler keńesiniń tóraǵasy Serik Shańǵutovqa «Aqtóbe oblysynyń Qurmetti azamaty» ataǵyn berý týraly sheshimin bekitti.

Eske salsa keteıik, Berdibek Saparbaev 2015-2019 jyldary aralyǵynda Aqtóbe oblysynyń ákimi qyzmetin atqardy.