«BerAlı» kompanııasynyń burynǵy qyzmetkerlerine jumys usynyldy

AQTAÝ. QazAqparat - Mańǵystaý oblysynyń ákimi Nurlan Noǵaev «BerAlı» kompanııasynyń burynǵy qyzmetkerlerimen kezdesti. Kezdesýde jınalǵandarǵa jalaqy men eńbek jaǵdaılaryn saqtaı otyryp, «MóldirMunaıServıs» JShS-ne uzaq merzimge (3 jyl) jumys usynyldy. Bul týraly Mańǵystaý oblysy ákiminiń baspasóz qyzmetinen málim etti, dep habarlaıdy QazAqparat tilshisi.

Kezdesýge «QazMunaıGaz» AQ tóraǵasynyń orynbasary Dáýletjan Hasanov, «Ózenmunaıgaz» AQ basshysy Nurdáýlet Qılybaı jáne jumyssyz qalǵan «BerAlı» kompanııasynyń burynǵy qyzmetkerleri qatysty.

Nurlan Noǵaev jergilikti atqarýshy bılik pen «Qazmunaıgaz» kompanııasy kóterilgen máseleni ońtaıly sheshýge yntaly ekenin aıtyp, barlyq túıitkilderdi kelissóz ústelinde sheshýge shaqyrdy.

«Óńir basshysy «BerAlı» mekemesiniń burynǵy qyzmetkerlerin jumysqa ornalastyrý «QazMunaıGaz» AQ erejeleri sheńberinde júrgiziletinin atap ótti. Sondaı-aq, ol tenderden utylǵan kompanııanyń qyzmetkerleri konkýrstyq rásimderdiń jeńimpazy atanǵan kompanııaǵa jumysqa ornalastyrylatynyn jetkizdi» delingen málimette.

Máselen, 2022 jyldyń sońynan bastap osy ýaqytqa deıin kúndelikti 192 shart boıynsha tenderlik rásimderdiń mártebesine taldaý jáne monıtorıng júrgizilgen, bul – shamamen 15 myń adam. Taldaý qorytyndysy boıynsha tenderden utylǵan merdiger kompanııalardyń qyzmetkerleri jumyssyz qalmaýy úshin ýaqtyly sharalar qabyldanyp jatyr.

Búgingi kúni tenderdiń nátıjeleri boıynsha jańa merdiger kompanııalarmen 57-ge jýyq shart jasalǵan, olardyń basym bóligi - uzaq merzimdi. Sondaı-aq, «QazMunaıGaz» ókildiginiń bastamasymen tenderlik qujattamaǵa aldyńǵy merdigerde jumys istegen qyzmetkerlerdi jumysqa ornalastyrý týraly talap engizilgen. Osy talapqa sáıkes utylǵan kompanııalardyń 3 myńnan astam qyzmetkeri jeńimpaz kompanııaǵa jumysqa ornalastyrylǵan.

Mundaı sharalar óz tıimdiligin kórsetip otyr. Bul utylǵan kompanııalardyń jumystan bosatylǵan qyzmetkerlerin qaıta jumysqa ornalastyrýdyń tıimdi quraly bolyp tabylady.

Osyǵan baılanysty «BerAlı» mekemesiniń burynǵy qyzmetkerlerine usynylǵan jumysqa turý jáne jumysty ońtaıly jaǵdaıda jalǵastyrý usynyldy.

«QazMunaıGaz» AQ ókilderi «BerAlı» mekemesiniń burynǵy qyzmetkerleri usynylǵan jumys ornynan bas tartqan jaǵdaıda, «Ózenmunaıgaz» AQ óndiristik jospar buzylmaý úshin konkýrstyq rásimderde jeńgen mekemege kezekte turǵan jumyssyz adamdardy alýǵa májbúr bolatynyn atap ótti.

«Sizderdiń munaı-gaz salasyndaǵy jumys tájirıbeńizdi eskere otyryp, sázderge «QazMunaıGaz» AQ qoldanystaǵy erejeleri aıasynda jumysqa ornalasý usynylady. Alaıda, «Ózenmunaıgaz» AQ-na tikeleı jumysqa ornalasý týraly talapty qanaǵattandyrý múmkin emes, sebebi bul qoldanystaǵy algorıtm sheńberinde jumysqa ornalasý kezegindegi Jańaózen qalasynyń basqa turǵyndary úshin ádiletsiz bolmaq. Men aqylmen sheshim qabyldap, jumysqa ornalasý týraly usynysty qabyldaýdy usynamyn», - dedi Nurlan Noǵaev.

Jergilikti atqarýshy organdar qolda bar jumys oryndaryn saqtaı otyra, jańa jumys oryndaryn qurý, sondaı-aq olardy turǵyndar arasynda ádil bólý jónindegi júıeli jumysty turaqty negizde jalǵastyrady.