Benzınniń ishki naryqtaǵy baǵasyn tómendetý múmkin emes - B. Saǵyntaev

ASTANA. QazAqparat - Benzınniń ishki naryqtaǵy baǵasyn tómendetý múmkin emes Búgin Parlament Senatynyń jalpy otyrysynda depýtattar saýalyna jaýap bergen QR Úkimet basshysynyń Birinshi orynbasary Baqytjan Saǵyntaev osylaı málimdedi. Eske salaıyq, otyrysta senatorlar «2014-2016 jyldarǵa arnalǵan respýblıkalyq bıýdjet týraly» zańyna ózgerister engizý týraly» zań jobasyn talqylaýda.

Toqtala ketetin jaıt, depýtat Qýanysh Aıtahanov elimizdegi janar-jaǵarmaı máselesine qatysty túsinik berýdi suraǵan bolatyn. «Janar-jaǵarmaı máselesine kelsek, bir jaǵynan bizde búgingi kúni ishki naryqta 1,5-1,9 mln. tonnaǵa jýyq tapshylyq bar. Zaýyttardan shyǵatyn ónim ishki suranysty tolyǵymen jappaıdy. Sol sebepten búgingi kúnge deıin benzındi Reseıden alyp, tapshylyqty toltyryp kelgen bolatynbyz. Onyń eki aradaǵy baǵasynda 20-30 teńgeniń kóleminde aıyrma bar. Sondyqtan da, bizge ishki naryqta bul baǵany odan da tómendetý esh múmkin emes», - dedi B. Saǵyntaev. Bul rette Premer orynbasary «QazMunaıGaz» kompanııasy jetispeıtin benzınniń barlyǵyn Reseıden óz qarajatyna alyp, shyǵynǵa batyp otyrǵanyn, al baǵa tómendetilse, atalǵan shyǵyn odan saıyn joǵarylaıtynyn jetkizdi. «Sondyqtan da, biz bastapqy formýlamen jumys jasap kelemiz. Degenmen, aldaǵy ýaqytta máseleni taǵy talqylap osy formýlany ózgertýdi de qarastyramyz», - dedi B. Saǵyntaev. Sonymen qatar, Birinshi orynbasar búgingi kúni Reseımen ǵana emes, Ázerbaıjanmen, Belarýs elimen, Qytaımen de kelissózder júrip jatqanyn atap ótti.