Benzın eksporty: Qazaqstan kedendik baj salyǵyn ózgertýge kiristi
«Kazenerdgy» qaýymdastyǵynyń bas dırektory Áset Maǵaýovtyń aıtýynsha, 2019 jyldyń 1 qańtaryna deıin Qazaqstan munaı ónimderin eksportqa shyǵara almaıdy. Atalǵan mindet arnaıy kelisimde kórsetilgen. Biraq bıyl úsh munaı óńdeý zaýyty tolyǵymen iske qosylǵannan keıin daıyn munaı ónimderiniń kólemi artady. Ony bir jaqqa eksporttaý qajet.
«Qazirgi kezde Energetıka mınıstrligi benzın men dızeldi otynnyń eksporty boıynsha kedendik baj salyǵyn ózgertýge kiristi. Biz de atalǵan jumysqa atsalysyp jatyrmyz. Endi, kelesi jyldyń 1-shi qańtaryna deıin benzın men dızeldi otyndy eksportqa shyǵara almaımyz. Degenmen, ózimizde munaı óńdeý kólemi aıtarlyqtaı artady. Sondyqtan jaqyn jáne alys shet elderge munaı óndimderin tasymaldaý joldary ashylsa eken deımiz», - dedi Á.Maǵaýov Astanada ótken baspasóz máslıxatynda.
Onyń sózine qaraǵanda, búginde munaı ónimderiniń aktsızderi salasynda birqatar máseleler bar. Otandyq ónim óndirýshiler tym kóp tóleıdi. Al kórshi reseılikter eki esege tómen aktsızdi tólep, óz ónimderin tasymaldaı beredi.
«Aktsızdiń mólsheri birdeı bolýy kerek. Máselen, reseılikter óz benzınin ımporttaǵanda 4 500 teńge tólese, otandyq zaýyttar 10 500 teńge tóleıdi. Sol sııaqty dızeldi otyn boıynsha kórshiler 540 teńge aýdarady. Al otandyq ónim úshin 9 300 teńge tóleýge týra kelip otyr», - dep atap kórsetti Á.Maǵaýov.
Aıta keteıik, búgin QR Syrtqy ister mınıstrligi men «Kazenerdgy» qaýymdastyǵy arnaıy baspasóz máslıxatyn ótkizip, sheteldiń dıplomattaryna munaı-gaz salasyndaǵy josparlar týraly aıtyp berdi.