Benzın baǵasynyń ósýin qazaqstandyqtardyń 10,2 paıyzy ǵana Kedendik odaqpen baılanystyrady

ALMATY. 21 qyrkúıek. QazAqparat /Erlik Erjanuly/ - QR Statıstıka agenttiginiń málimetine qaraǵanda 8 aıda benzın baǵasy Qazaqstanda 21 paıyzǵa qymbattaǵan. Búgin Almatyda Saıası sheshimder ınstıtýty osyǵan baılanysty júrgizilgen áleýmettik zertteý jumysynyń qorytyndysyn jarııalady.

Onda respondentterdiń 21,4 paıyzy baǵanyń qymbattaýyna Munaı jáne gaz mınıstrligi men Monopolııaǵa qarsy komıtet kináli degen. Olardyń paıymdaýynsha, memlekettik retteýshilerdiń qyzmeti tıimsiz bolýda. El turǵyndarynyń 20,3 paıyzy bolsa benzın baǵasynyń ósýine "munaı ónimderin óndirýshiler men tasymaldaýshylardyń ózara aýyz jalasýy" túrtki bolyp otyr degen. Janar-jaǵar maı baǵasynyń sharyqtaýyn qazaqstandyqtardyń 15,3 paıyzy munaı óńdeý salasyn damytý saıasatynyń jan-jaqty oılastyrylmaýy kináli dep sanaıdy. Saýalnamaǵa qatysqandardyń 11,7 paıyzy bul jıyn-terin kezinde jyl saıyn qaıtalanatyn úırenshikti másele dese, 10,2 paıyz oǵan Keden odaǵy áser etýde degen pikirde. Al 9,3 paıyzy elimizdiń munaı óńdeý qýatynyń tómendigi men naryqtyń joǵary oktandy benzın ımportyna degen táýeldiligi benzın baǵasynyń turaqsyzdyǵyn qalyptastyryp otyr degendi aıtýda.

Memlekettik retteýshiler qyzmetiniń tıimdiligine respýblıkanyń ózge óńirlerine qaraǵanda batys qazaqstandyqtar kóbirek kúmándanady. Bul eldegi ortasha kórsetkeshten 1, 3 ese joǵary bolyp otyr. Al ońtústik qazaqstandyqtar (23,9 paıyz) óndirýshiler men tasymaldaýshylardyń aýyz jalasýyn, astanalyqtar salany damytýdaǵy saıasattyń durys oılastyrylmaýyn (32,8 paıyz) benzın baǵasynyń ósýiniń basty sebebi dep otyr.