Benzın baǵasy ósýi múmkin be – Energetıka mınıstriniń jaýaby

<p>ASTANA. KAZINFORM &ndash; QR Energetıka mınıstri Almasadam Sátqalıev aldaǵy ýaqytta benzın baǵasy ósýi múmkin ekenin aıtyp, onyń negizgi sebebin túsindirdi.</p>

«Qazir bizdegi naryqta tapshylyq bar. Tapshylyqty jabý jáne energetıkalyq táýelsizdikti qamtamasyz etý úshin ınfraqurylymdy jańǵyrtý jumystary atqarylyp jatyr. Modernızatsııany júzege asyrý úshin salaǵa aqshany salý qajet. Munaı ónimderiniń baǵasyna jabdyqty satyp alýǵa, tehnıkalyq qyzmet kórsetý men ózge de shyǵyndaryna, logıstıkaǵa, jańa qubyrlar men temirjol ınfraqurylymyn salýǵa tartylǵan nesıeler kiredi. Osy jumystardyń barlyǵy munaı ónimderiniń bazalyq qunyna áser etedi», - dedi A. Sátqalıev Parlament Májilistegi Úkimet saǵatynan keıin tilshiler suraǵyna jaýap bere otyryp.

Onyń aıtýynsha, janarmaıdyń sońǵy quny ishki naryqtaǵy munaı baǵasynyń qandaı mejede qalyptasýyna baılanysty bolady.

«Qazir ishki naryqtaǵy munaı baǵasy kórshiles eldermen salystyrǵanda eń tómen, munaı ónimderiniń baǵasy da tómen dep aıta alamyz. Al eger naryq ashylsa, bizdiń arzan ónimderimiz (kórshi elderge) tarap ketedi. Sonyń saldarynan janar-jaǵarmaı baǵasy kúrt ósýi yqtımal», - dedi mınıstr.

Osyǵan deıin Almasadam Sátqalıev jańa munaı óńdeý zaýyty batys óńirde salynatyny habarlaǵan edi.