Benıamın Netanıahý BUU Bas assambleıasynda Iranǵa shúılikti

<p>ASTANA. KAZINFORM — Izraıl premer-mınıstri Bınıamın Netanıahý eger eline shabýyl jasalsa, Iranǵa «qatań jaýap qaıtaramyz» dep qorqytty, dep jazady <a href="https://www.dw.com/ru/netanahu-v-oon-prigrozil-iranu-dlinnoj-rukoj-izraila/a-70349127" target="_blank" rel="noopener">DW.</a></p>

— Tegerandaǵy tırandarǵa aıtar sózim bar: eger siz bizge shabýyl jasasańyz, biz de sizge shabýyl jasaımyz. Iranda Izraıldiń uzyn qoly jetpeıtin jer joq jáne bul búkil Taıaý Shyǵysqa qatysty, — dedi Izraıl úkimetiniń basshysy juma kúni Nıý-Iorkte BUU Bas assambleıasynda sóılegen sózinde.

Netanıahý sondaı-aq, el ishindegi azamattardyń qysymyn jáne Tegerannyń syrtqy agressııasyn elemeý arqyly Irandy tynyshtandyrýǵa tyrysyp jatqan halyqaralyq qaýymdastyqty synady. 

Izraıl premer-mınıstri sonymen qatar Halyqaralyq qylmystyq sottyń bas prokýrory Kárim Handy «taza antısemıtızm» úshin aıyptady, ol Netanıahýdy tutqyndaýǵa order surap, onyń Gaza sektoryndaǵy soǵys qylmystary úshin jaýapty ekenin alǵa tartqan.

Netanıahý óz sózinde álemdik uıymnyń Izraılge degen ádiletsiz kózqarasyn aıyptap, BUU-nyń «menmendik farsqa» aınalǵanyn aıtty. 

— Izraıldiń evreı memleketine basqa eldermen birdeı qarym-qatynas jasalmaıynsha, antısemıttikten arylǵansha, BUU ádil oılaıtyn adamdar úshin «menmendik fars» sanalady, — dedi Izraıl premer-mınıstri.

Onyń aıtýynsha, Izraıl «Hezbollany joıýdy jalǵastyrady».

Benıamın Netanıahý Izraıldiń «ızraıldikterdi Lıvanmen shekaradaǵy úıine qaıtarý úshin Hezbollany joıýǵa tolyq quqyǵy bar» dep atap ótti.

Izraıl bir jyl boıy "kisi tózgisiz jaǵdaıǵa shydap kele jatqanyn» aıtty.

Netanıahý minberge kóterilgen kezde birqatar elden kelgen delegattar zaldan shyǵyp ketti.