Bender-Abbas portynda Qazaqstannyń termınalyn salýdan úmittimiz - Elbasy
«Eýropa men Azııa arasyndaǵy transqurlyqtyq mýltımodaldy tasymal belsendi damýda. Elimiz arqyly 5 temir joly jáne 6 halyqaralyq avtomobıl joly ótedi. Transkaspıı mýltımodaldy tasymaldy damytý maqsatynda biz keıingi kezderi óte kóp jumys jasadyq. «Nurly jol» baǵdarlamasy men Qytaıdyń «Jibek joly» baǵdarlamasy birigip, úlken jumystar atqaryldy», dep atap ótti Nursultan Nazarbaev.
Memleket basshysy Qazaqstannyń ulan-ǵaıyr jerinde 4 jyldyń ishinde 5 myń shaqyrym avtomobıl joly, 2,5 myń shaqyrym temirjol salynǵanyn atap ótti. Sonymen qatar Qytaıdyń Shyǵys jaǵynda, Tynyq muhıty shetindegi Lıanıangan portynda Qazaqstannyń termınaly salynǵanyn aıtty.
«Sol port arqyly Qytaı, Qazaqstan, Reseı arqyly Eýropaǵa ótip jatqan konteınerlerdiń sany jyl saıyn eki esege ósip otyrady. Endi qazir biz Aqtaý portyn jańarttyq, onyń múmkindigi keńeıdi. Qazaqstan-Ázerbaıjan-Grýzııa-Túrkııa-Kars-Kartsahı jolyn paıdalantyn bolsaq, jańadan múmkindikter paıda bolady. Osy joldyń joqtyǵynan biz Qara teńiz, Reseı arqyly kelip otyratynbyz. Ol qıyn edi. Qazir tikeleı jolmen shyǵýǵa múmkinshilik bar, paıdalanýymyz kerek», - dedi Memleket basshysy.
Nursultan Nazarbaev Qazaqstan Túrikmenstan, Iran arqyly Parsy shyǵanaǵyna da shyqqanyn aıtty.
«Bender-Abbas portynda Qazaqstannyń termınalyn salýdan úmittimiz. Sonymen Kaspıı porttarynyń jalpy jyldyq ótkizý qabileti 25 mln tonnaǵa jetti. Olar Qytaıdy, Azııanyń basqa memleketterin Jerorta teńizi arqyly Túrkııamen baılanystyratyn bolady. Bul múmkinshilikterdi Túrkııa kompanııalarynyń qoldanýyna biz ár ýaqytta da múddelimiz. Oǵan barlyq jaǵdaı jasaımyz», - dedi Elbasy.
Aıta keteıik, Qazaqstan Prezıdentimen kezdesýge Túrkııa ekonomıkasynyń 15 paıyzyn quraıtyn 25 kompanııanyń basshylary qatysty. Atalǵan kompanııalar aýyl sharýashylyǵy, tamaq ónerkásibi, geologııa jáne taý-ken óndirý ónerkásibi, hımııa ónerkásibi, mashına jasaý, jeńil ónerkásip, densaýlyq saqtaý jáne farmatsevtıka salalarynda jumys isteıdi.