Belsendi qoǵamdyq baqylaý - referendýmnyń ashyq ári ádil ótýiniń kepili – Halyqaralyq baıqaýshy

NUR-SULTAN. QazAqparat – Keshe ótken referendýmnyń qorytyndysy boıynsha halyqaralyq baıqaýshylar oıyn ortaǵa saldy. Reseı Federatsııasy saılaý komıssııasynyń múshesi, halyqaralyq baıqaýshy Pavel Andreevtiń málimdeýinshe, halyq referendým kúni jaqsy kóńil-kúıde boldy, dep habarlaıdy QazAqparat tilshisi.

«Ata zańǵa ózgeris engizý kez kelgen memleket úshin mańyzdy sát. Biz baıqaýshy bolǵan ýchaskelerde qatysýshylardyń belsendiligi baıqaldy. Ásirese qoǵam belsendileriniń jaǵdaıdy qadaǵalap, baqylaýy erekshe kózge tústi. Men Nur-Sultan qalasynda jáne Aqmola oblysyndaǵy referendým ýchaskelerinde boldym. Halyqtyń kóńil-kúıiniń joǵary ekeni kórindi. Kóbisi otbasymen kelip jatty. Referendýmdy uıymdastyrý, ótkizý protsesteri boıynsha kúdik bolmady. Komıssııa músheleri tyńǵylyqty daıyndalǵan», - dedi Pavel Andreev BAQ ókilderine arnalǵan baspasóz máslıhatynda.

Onyń aıtýynsha, belsendi qoǵamdyq baqylaýdyń bolýy referendýmnyń ashyq ári ádil ótýiniń kepili.

«Men bolǵan referendým ýchaskelerinde qoǵamdyq uıym ókilderi boldy. Keıbir ýchaskede ondaǵan qoǵam belsendisi baıqaldy. Bul - qoǵam ókilderi elde bolyp jatqan jaıttarǵa beı-jaı qaramaıdy degendi bildiredi. Uıymdastyrý jumystary joǵary deńgeıde boldy. Keshegi aıtýly sharaǵa shetelden 270 baıqaýshy keldi. Túrli eldermen qatar halyqaralyq uıymdardyń da ókilderi referendýmnyń ótý protsesin qadaǵalady», - deıdi ol.