Belgisiz adamdar ózbekstandyqtarǵa terakt jasaýǵa úndeıtin hattar joldap jatyr

<p>TAShKENT. KAZINFORM &ndash; Ózbekstanda belgisiz adamdar áleýmettik jeliler arqyly terrorlyq aktilerdi uıymdastyrýǵa shaqyratyn habarlamalar taratyp jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Ózbekstan ІІM málimetinshe, álem elderindegi lańkestik shabýyldardan soń Ózbekstan jáne oǵan irgeles memleketterdiń turǵyndaryna adamdar kóp jınalatyn obektilerde terakt uıymdastyrýǵa shaqyratyn habarlamalar túsip jatyr.

«Arandatýshylyq habarlamalardyń kóbi Telegram messendjeri arqyly jiberiledi. Belgisiz adamdar túrli somalar tóleýge, qarý-jaraqpen qamtamasyz etýge jáne is-qımyl josparyn jiberýge ýáde berýde. Eń qorqynyshtysy, teris pıǵyldylar kóbine balalarǵa hattar joldap jatyr. Keıbir elderde arańdatýshylar búldirshinder týraly barlyq derekterdi biletin alǵa tartyp, sol arqyly qorqytyp, qysym kórsetken jaǵdaılar tirkeledi. Mundaı adamdardyń sýretteri joq jáne baılanys nómirleri jasyrylǵan», - dep málim etti vedomstvodan.

Mınıstrlik mamandary mundaı habarlamalardy alǵan kezde úreıge boı aldyrmaýǵa, olardy ózge de chattarǵa, tanystaryna jáne dostaryna jibermeýge shaqyrady. Tıisinshe, dereý 102 nómiri boıynsha habarlasyp, ishki ister organdaryna habarlaý qajet.

«Hatty jibergenderdi buǵattańyz jáne olarǵa jaýap berip, sóılesýge tyryspańyz. Esińizde bolsyn, alaıaqtar muny kópshilik arasynda dúrbeleń týdyrý úshin jasaıdy. Al respýblıkanyń quqyq qorǵaý organdary qaýipsizdikti qamtamasyz etý úshin barlyq sharalardy qabyldaıdy», - delingen mınıstrliktiń málimdemesinde.

Qosa ketsek, buǵan deıin Ózbekstan prezıdenti Shavkat Mırzıeev Reseıdegi teraktige qatysty pikir bildirip, halyqaralyq ahýaldyń odan saıyn kúrdelene túskenin málimdegen edi.