Belgradta úkimetke qarsy jappaı narazylyq sharalary basylmaı tur

ASTANA. QazAqparat – Serbııada ekinshi aı qatarynan el prezıdenti men úkimetiniń otstavkaǵa ketýin talap etken narazylyq aktsııalary toqtamaı tur. Aleksandr Výchıchtiń merziminen buryn saılaý ótkizemiz degen ýádesi shıelenisti azaıtqan joq, dep habarlaıdy QazAqparat Euronews agenttigine silteme jasap.

On myńdaǵan manıfestant Belgradtyń ortalyq kóshe men alańdaryn toltyryp, úkimettiń aýysýy men úkimetshil BAQ-tyń lıtsenzııasyn qaıtaryp alýdy talap etip jatyr.

Narazylyq aktsııalary mamyrda bolǵan eki jappaı atystan keıin órship ketti.

Serbııa prezıdenti merziminen buryn saılaý ótetinin aıtty. Biraq, bul narazy toptyń kóńilin kónshitpegen tárizdi.

Euronews agenttiginiń tilshisi Maııa Popovıchtiń aıtýynsha, bul – Serbııadaǵy kúsh kórsetýge qarsy altynshy narazylyq aktsııasy.

«Talap burynǵydaı - birinshi kezekte ishki ister mınıstri men Qaýipsizdik jáne aqparattandyrý agenttigi basshysynyń otstavkaǵa ketýi. Sondaı-aq olar kúsh kórsetýdi nasıhattaıtyn telearnalardy japqysy keledi. On myńdaǵan manıfestant Serbııa parlamenti ǵımaratynyń aldynda tur. Adamdar áli de kelip jatyr», - dedi ol.