Belgili jazýshy, jýrnalıst Jumabaı Shashtaıuly ómirden ótti

<p>ASTANA. KAZINFORM &ndash; Qazaq prozasyna &laquo;Aspanqora&raquo;, &laquo;Shal men jylqy&raquo;, &laquo;Quralaıdyń salqyny&raquo; sııaqty klassıkalyq shyǵarmalardy syılaǵan jazýshy, birqatar basylymda bas redaktor qyzmetin atqarǵan jýrnalıst Jumabaı Shashtaıuly qaıtys boldy.</p>

Qaraly habardy Májilis depýtaty Janarbek Áshimjan jetkizdi.

«Qasıetti Orazanyń ekinshi kúni qazaqtyń birtýar qalamgeri, asyl aǵamyz Jumabaı Shashtaıuly Jaratqannyń quzyryna qaıtypty. Birneshe býynǵa ustaz bolǵan, adal hám tap-taza qalpynan aınymaı, sońynan bir aýyz bóten sóz ilestirmegen Jumaǵań týraly aıtar jaqsy áńgime kóp. Jaqsylar shetinen ketip jatyr», — dep jazady ol.

Jumabaı Shashtaıuly 1950 jyly Jambyl aýdany Jambyl aýylynda dúnıege kelgen.

Ol «Kommýnızm joly» gazetinde, 1980-87 jyldary respýblıkalyq «Lenınshil jas», «Sotsıalıstik Qazaqstan» gazetterinde, 1987-90 jyldary «Jalyn» jýrnalynda jumys istedi.

1990-92 jyldary «Qazaq tili» qoǵamy Almaty oblystyq komıteti tóraǵasynyń orynbasary, 1992-96 jyldary «Jas Alash», «Qazaq ádebıeti» gazetterinde bólim meńgerýshisi, 1996-2002 jyldary halyqaralyq «Zaman-Qazaqstan» gazetiniń bas redaktory boldy.

2002 jyldan Qazaq radıosynyń bas redaktory qyzmetin atqardy. 2008-2017 jyldary «Qazaq ádebıeti» gazetinde bas redaktor bolǵan.

«Tań nury» atty ujymdyq jınaqqa «Qııada» atty alǵashqy povesi endi. 1984 jyly shyqqan «Qyzyl qar» atty tuńǵysh jınaǵy sol kezdegi saıası basshylyq tarapynan qatal synǵa ilikti. «Jala men nala» (1987 j), «Jyr jolbarys» (1996 j), «Bizdiń zamannyń Aıaz bıi» (1997 j), «Jańǵyryq» romany (2004 j), tańdamaly 2 tomdyq jınaǵy (2010 j) jáne «Aıaz bı» romany «Jazýshy» baspasynan qaıta basylyp shyqqan (2013 j).