Belgili vaınerler sotqa merziminen buryn bosatý týraly ótinishpen júgindi

<p>ALMATY. KAZINFORM &ndash; Mudarabah Capital qarjy pıramıdasyn qurý isi boıynsha bes jylǵa sottalǵan belgili vaınerler Meıirjan Tórebaev pen Meıirhan Shernııazov sotqa merziminen buryn bosatý týraly ótinish túsirdi.</p>

Almaty qalalyq sotynyń baspasóz qyzmetinen málim etkendeı, Meıirjan Tórebaev pen Meıirhan Shernııazovqa qatysty materıaldar Túrksib aýdandyq sotyna qaraýǵa joldandy.

Buǵan deıin Pavlodar oblysynyń № 44 mekemesinde jazasyn ótep jatqan, Meıirjan Tórebaev pen Meıirhan Shernııazovtyń Almatydaǵy kolonııaǵa aýystyrylǵany týraly jazǵan edik.

Eske salaıyq, byltyr maýsym aıynda Almatyda Mudarabah Capital qarjy pıramıdasyn qurý isi boıynsha sot úkimi shyqqan bolatyn. Atalǵan is boıynsha vaınerler Meıirjan Tórebaev pen Meıirhan Shernııazov 5 jylǵa sottaldy.

Sondaı-aq, qarjy pıramıdasyn qurdy dep sottalǵan Meıirjan Tórebaevtyń áıeli Dana Eseeva áleýmettik jelide kúıeýi men balalarynyń vıdeosyn jarııalaǵanyn jazǵanbyz.

Keıin Pavlodar oblysy qylmystyq-atqarý júıesi departamenti sottalýshy Meıirjan Tórebaevtyń nege úıine jiberilgenin túsindirdi. 

Osy jyldyń basynda vaınerler Meıirjan Tórebaev pen Meıirhan Shernııazov sotqa apelıatsııalyq shaǵym túsirdi.

Alaıda apellıatsııalyq sot vaınerlerge qatysty úkimdi ózgerissiz qaldyrdy.