Belgili balýan basshylyq qyzmetke taǵaıyndaldy
Bul týraly óńirdegi Kúres federatsııasynyń baspasóz qyzmeti málim etti.
- Búgin Federatsııa prezıdenti Dáýlet Turlyhanovtyń sheshimimen Maqsat Arshabaıuly resmı túrde Qostanaı oblysynyń grek-rım, erkin jáne áıelder kúresi federatsııasynyń Prezıdenti bolyp taǵaıyndaldy, - delingen habarlamada.
Maqsat Arshabaıuly — grek-rım kúresinen halyqaralyq dárejedegi sport sheberi, Azııanyń úsh dúrkin chempıony, áskerıler arasyndaǵy álem chempıonatynyń qola júldegeri, sondaı-aq Qazaqstan Respýblıkasynyń bes dúrkin chempıony.
Bul taǵaıyndaý óńirdegi kúres sportynyń damýyna jańa serpin berip, jas talanttardyń kókjıegin keńeıtetin tyń belesterge bastaıdy dep senemiz. Maqsat Arshabaıulynyń tájirıbesi men kásibı biliktiligi Qostanaı oblysynyń sporttyq jetistikterin eseleı túseri anyq.
Al Qostanaı oblysynyń Grek-rım, erkin jáne áıelder kúresi federatsııasynyń atqarýshy dırektory qyzmetine Talǵat Jıentaev taǵaıyndaldy.
Esterińizge sala keteıik, keshe Astanada Qazaqstan Respýblıkasynyń Grek-rım, erkin jáne áıelder kúresi federatsııasynyń 2024 jyldyń qorytyndysyna arnalǵan esep berý konferentsııasy ótip, jyldyń úzdikteri marapattalǵan bolatyn.