Belgııadaǵy jalpyulttyq ereýil: 30 myńǵa jýyq adam kóshege shyqty

<p>BRıÝSSELЬ. KAZINFORM &ndash; Dúısenbi kúni Belgııada túrli sala ókili qatysqan jalpyulttyq ereýil ótip jatyr, dep habarlaıdy <a href="https://www.inform.kz/ru/masshtabnaya-zabastovka-v-belgii-na-ulitsi-vishli-okolo-30-tisyach-chelovek-a3c9cd" target="_blank" rel="noopener">Kazinform</a>&nbsp;tilshisi.&nbsp;</p>

Brıýssel men Vallonııada poıyz qatynasy, poshta baılanysy jáne orta bilim berý mekemeleriniń jumysy toqtatyldy. Ereýil sondaı-aq áýe kompanııalardyń kestelerine, kommýnaldyq qyzmetkerlerge jáne jergilikti túrmelerge áser etti.

ABVV-FGTB sotsıalıstik kásipodaqtar federatsııasynyń prezıdenti Terrı Bodsonnyń belgııalyq BAQ-qa habarlaýynsha, dúısenbi kúni tańerteń Brıýssel kóshelerine 30 myńnan astam demonstrant shyqty. Sherýdiń bastapqy núktesi Ortalyq temirjol vokzaly boldy. Kolonnany Lej, Brıýssel qalalary men Flandrııanyń bir bóliginen kelgen 100-ge jýyq órt sóndirýshi basqardy, odan keıin frantsýz jáne nıderland tilderin biletin kásipodaq ókilderi júrdi. Flamand muǵalimderi sherýge qatysýshylardyń eń kóp bóligin qurady.

Foto: Belga/ Hatim Kaghat

Úsh flamandtyq bilim berý uıymy ereýildiń bastaýysh bilimge eń kóp áser etkenin rastady. Kóptegen bastaýysh mektep oqýdy toqtatty nemese qashyqtan oqytýdy engizdi. Keıbir bilim mekemelerinde qyzmetkerlerdiń qatysýy tómen bolǵany sonshalyq, olar balalarǵa kútim uıymdastyra almaǵandyqtan, mektepter jabyq kúıinde qaldy.

Sharany uıymdastyrýshylardyń atap ótýinshe, Belgııanyń ekonomıkasy, ásirese onyń ónerkásibi suranystyń tómendeýine, jumys kúshi men energııa qunynyń ósýine jáne ákimshilik júktemelerge baılanysty qıyn jaǵdaıda qalyp otyr. 

Foto: The Brussels Times

Kásipodaqtar Belgııa úkimetiniń «jumys isteıtin erler men áıelderdiń quqyqtaryn buryn-sońdy bolmaǵan buzý» dep sanaıtyn reformalaryna qarsylyq bildirip otyrǵanyn málimdedi. 

Olar reformalarǵa jalaqyny toqtatý, ındeksteý reformasy, jumys ýaqytynyń artýy, qaýipti eńbek kelisimsharttary, qatań únemdeý, memlekettik qyzmetterdi qysqartý jáne zeınetaqyny qysqartý perspektıvalary kirýi múmkin ekenin eskertti.

Buǵan deıin 13 qańtarda Belgııada birden birneshe salaǵa áser etetin aýqymdy ereýil josparlanǵanyn jazǵan bolatynbyz.