Belgııada jaqyndarynyń murasynan bas tartatyndar kóbeıdi

<p>Belgııalyq notarıýstardyń sózinshe, jaqyndary qaza tapqannan keıin onyń muraǵa qalǵan múlkinen bas tartatyn belgııalyqtar sany kóbeıgen, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.</p>

Mundaı úrdiske Belgııa turǵyndarynyń sońynan qaryz qalatyny, ony jaqyndary qabyldaýdan bas tartatyny sebep bolǵan.

Belgııa notarıaldyq federatsııa dereginshe, 2022 jyly 51 817 azamat notarıýs arqyly tegin muradan bas tartqan. 2018 jyldan beri bas tartqandar sany 44%-ke ósti. Oǵan sebep — jaqyn adamynyń kredıtorlarǵa qaryzy kóp. 

Belgııa azamaty Gerı Lele ákesi qaıtys bolǵannan keıin muradan bas tartý úshin birden notarıýs izdeı bastaǵanyn aıtady.

— Birinshiden, maǵan odan eshteńe kerek emes edi, oǵan qosa onyń ómir saltyn bilgendikten qaryzy bar degen kúmánim boldy. Biraq mundaı áreketke barmadym. Ókinishke qaraı, munym qatelik bolypty. Birneshe kúnnen keıin-aq alǵashqy qaryz vekselderi túse bastady — deıdi G.Lele.

Taǵy bir turǵyn Kerolaınnyń ákesimen qarym-qatynasy jaqsy boldy, biraq ol ápkesi ekeýi muradan bas tartamyz dep sheshken.

— Biz onyń qaryzy bar ekenin, kúndelikti aqshaǵa ıelik etý oǵan qıyn ekenin bildik. Sol sebepti ózimizdi qolymyzdan kelgenshe qorǵadyq. Ol kezde tańdaý aıqyn boldy. Men kolledjdiń jap-jas stýdentimin, sol sebepti qaryzdy tóleıtin múmkindigim bolǵan joq, — deıdi áıel.

Belgııalyq muragerler múlikten bas tartqannan keıin kredıtorlar olardan qaryz tóleýdi talap ete almaıdy.

Degenmen muradan bas tartqan adam qaıtys bolǵan jaqynynyń eshbir zatyn ákete almaıdy. Jergilikti notarıýsterdiń sózinshe, muradan bas tartqan tulǵa ata-anasyna tıesili, onyń ishinde otbasylyq estelikterdiń eshqaısysyn ala almaıdy.

— Shaǵyn ǵana zatty, tipti qarapaıym kádesyıdy alýdyń ózi muradan bas tartý shartyn buzady. Sodan keıin memleket siz murany qabyldadyńyz dep esepteıdi, — dep tolyqtyrdy notarıýs.

Ókinishke qaraı, keı adamdardyń otbasylyq úıi, onymen birge ishindegi zattyń bári ózgeniń ıeligine ketedi.

Kerolaın úshin ákesiniń qazasyna osyndaı synaq ta qosyldy:

«Onyń úıi bolǵan joq. Biraq men keıbir estelikterdi, ájeme tıesili zattardy qaıtarǵym keler edi. Olardyń esh qundylyǵy joq, jáı ǵana qonaq bólmede turǵanyn kórý unaıtyn».

Belgııa zańy boıynsha, bas tartqan jaǵdaıda, mura kelesi urpaqqa, tipti ol kámelet jasyna tolmaǵan bala bolsa da ótedi.

— Eger balańyz bolsa sottan balańyz úshin de muradan bas tartýdy suraýyńyz qajet bolady, áıtpese mura, ıaǵnı qaryz da onyń moınyna júktelip ketedi, — dep rastady notarıýs Sılven Bave.

Belgııalyq notarıýstar muradan bas tartýǵa úsh jaǵdaı sebep bolyp otyr deıdi: elde áleýmettik-ekonomıkalyq turaqsyzdyqtyń artýy, azamattardyń bas tartý múmkindigi týraly habardarlyǵy men jaqyndardyń birge turmaýy, ıaǵnı otbasy buzylǵan jaǵdaı.

— Bul adamdar ómir boıy jumys isteıdi, balalaryn qalyptastyrǵysy keledi. Ómirinde qaıǵyly jaǵdaı, aýrý paıda bolǵan kezde baılanys úziledi. Baı adamdar murany jalǵastyra alady, al orta tap pen kedeılerdiń oǵan shamasy jetpeıdi. Bul — ádiletsizdik, — dep qorytyndylady sózin Kerolaın.