Belgııada otandasymyz Jánibektiń asyrap alǵan anasy qaıtys boldy
«Dostar, Jánibekti asyrap alǵan Valerı anasy bul ómirmen qosh aıtysty. Evtanazııa tásilimen. 20 jyldan beri Jánibektiń anasy bolǵan, ózi aýyrsa da, meıirimin Jánibekke bere bilgen Valerıdiń máńgilik ómiri endi bastaldy. 54 jas. Jánibek berik bol…», - delingen Qymbat Dosjannyń Instagram paraqshasynda.
Jelidegi jazbanyń astyna Jánibek «Meni qoldaǵan týǵan elimdegi árbir otbasyna alǵys aıtamyn. Men sizderdi jaqsy kóremin. Jaqynda sizdermen taǵy qaýyshýǵa asyqpyn», - degen pikir qaldyrǵan.
Aıta ketsek, otandasymyz buǵan deıin asyrap alǵan anasynyń densaýlyǵy nasharlap, qatty qınalyp jatqanyn aıtqan edi.
Eske sala keteıik, bıyl qańtarda Belgııa azamaty asyrap alǵan 22 jastaǵy Jánibek Jumaǵulov (Djanı) Qazaqstanda týǵan anasyn izdep kelgeni týraly jazǵan edik. Otandasymyzdyń anasyn izdestirý jumystarynyń barysymen Jánibek Jumaǵulovtyń Qazaqstandaǵy resmı ókili Qymbat Dosjan aıtyp berdi.
Sondaı-aq, Qazaqstanǵa qaıta kelgen belgııalyq Jánibek Jumaǵulov Astanadaǵy balalar úıine bardy.
Odan bólek, Іshki ister mınıstriniń birinshi orynbasary Marat Qojaev atalǵan jaıtqa qatysty qylmystyq is qozǵalyp, otandasymyzdyń ata-anasy izdestirilip jatqanyn jetkizdi.