Belgili jazýshy Qajybek Tótekın ómirden ozdy

NUR-SULTAN. QazAqparat – Qytaı elinen atamekenine qonys aýdarǵan qandasymyz, belgili aqyn, jazýshy Qajybek Tótekın ómirden ozdy, dep habarlaıdy QazAqparat.

Qajybek Tótekın - Qytaı elindegi qazaqtar arasynda jazýshylyq eńbegimen keńinen tanylǵan belgili qalamger.

Ol 1940 jyly 1 jeltoqsanda Qytaıdyń Tarbaǵataı aımaǵy Toly aýdany Maıly taý baýraıynda dúnıege kelgen. Shyǵarmashylyǵyn 1958 jyly «Shuǵyla» jýrnalyna shyqqan «Uly jospar» degen óleńimen bastaǵan. Sodan beri ádebıettiń barlyq janrynda qalam terbegen.

Qajybek Tótekınniń Qytaı elinde «Dóńgelengen dúnıe» atty áńgime-povester jınaǵy, «Saqabanyń satıralary» esse-áńgimeler jınaǵy, «Serýen sezimder» atty jyr kitaby jaryq kórgen. Budan basqa «Janym saǵan aıtaıyn» jyr kitaby, «Boıtumar» áńgime-esse kitaby, «Darymaǵan qarǵys» atty óleń romany Qazaqstanda jaryq kórgen.

Bıyl «Atasy men Edigeniń qyzyqty hıkaıalary» atty balalarǵa arnalǵan kitaby men «Osy sharda men barmyn» atty jyr jınaǵy baspaǵa usynylǵan.

Qytaı jerinen kóship kelgen jazýshynyń shańyraǵy Almaty oblysyna qonystanǵan.

Talantty jazýshynyń esimi Qytaıdaǵy memlekettik «Ádebıet kórkemóner salasyndaǵy áıgili adamdar» entsıklopedııasyna, «20-ǵasyr Qytaı jazýshylary» entsıklopedııasyna engen. Shyńjań jazýshylar qoǵamynyń, Qazaqstan avtorlar qoǵamynyń múshesi.