Belgili aqyn Qoıshyǵul Jylqyshıev dúnıeden ozdy

ASTANA. QazAqparat – Belgili aqyn, Qazaqstannyń eńbek sińirgen qaıratkeri, Qazaqstan Jazýshylar odaǵy Atyraý oblystyq fılıalynyń dırektory Qoıshyǵul Jylqyshıev 74 jasynda dúnıeden ozdy, dep habarlaıdy QazAqparat tilshisi.

Qoıshyǵul Jylqyshıevtiń qaıtqany jóninde aqyn-jazýshylar áleýmettik jelidegi paraqshalarynda jazyp, marqumnyń otbasyna, týma-týystaryna kóńil aıtyp jatyr.

Qoıshyǵul Jylqyshıev 1948 jyly 24 qazanda Atyraý oblysy Inder aýdany Jarsýat aýyldyq keńesine qarasty Jamanqudyq jaılaýynda dúnıege kelgen.

1975 jyly QazMÝ-diń jýrnalıstıka fakýltetin bitirgen. Qazaq KSR Mádenıet mınıstrliginde, Qazaq teledıdarynda qyzmet istedi. «Ónerpaz» qoǵamdyq qaıyrymdylyq qorynyń jáne respýblıkalyq «Mahambet» qorynyń prezıdenti boldy.

«Tamasha» oıyn-saýyq otaýyn ashqany úshin (Luqpan Esenovpen birge) avtorlyq kýálik berilgen.

Keıingi jyldary Qazaqstan Jazýshylar odaǵy Atyraý oblystyq fılıalynyń dırektory bolyp qyzmet atqardy. «Tuńǵysh», «Muń-kitap», «Asaýker» jyr jınaqtarynyń avtory.

M.Ótemisuly týraly pýblıtsıstıkalyq maqalary úshin Qazaqstan Jýrnalıster odaǵynyń A.Baıtursynov atyndaǵy syılyǵyn aldy (1996 jyl). Sondaı-aq Mahambet atyndaǵy syılyqtyń laýreaty, Qazaqstannyń eńbek sińirgen qaıratkeri (2003 jyl).