«Belavıa» Irak, Sırııa jáne Iemen azamattaryn Túrkııadan Belarýske tasymaldaýyn toqtatady
«Túrkııanyń quzyrly organdarynyń sheshimi boıynsha, 2021 jyldyń 12 qarashasynan bastap Irak, Sırııa, Iemen azamattary Túrkııadan Belarýske ushyrylatyn reısterge qabyldanbaıdy», - delingen kompanııa baspasóz qyzmetiniń juma kúni jarııalaǵan, habarlamasynda.
Onda «Belavıa» áýe kompanııasynyń tyıym salynǵan jolaýshylary áýe bıletin satyp alǵan jerge tapsyryp, aqshasyn qaıtaryp alatyny atap ótildi. Buǵan deıin Belarýs pen Polsha shekarasyndaǵy kóshi-qon daǵdarysyna baılanysty Turkish Airlines áýe kompanııasynyń Irak, Sırııa jáne Iemen azamattaryna óz reısine bılet satpaıtyny habarlanǵan. Bıletterdi tek dıplomatııalyq tólqujaty bar azamattar ǵana satyp alady. Jyl basynan beri mıgranttar kóptep jınalǵan Belarýs pen Latvııa, Lıtva men Polsha shekarasyndaǵy mıgratsııalyq jaǵdaı 8 qarashada kúrt shıelenisken.
Belarýs jaqtan Polsha shekarasyna qaraı birneshe myńdaǵan adam jınalyp, shekara aımaǵynan ketpeýde. Olardyń kóbi Polshaǵa tikendi symnan jasalǵan bógetti buzyp ótpek bolǵan.
EO elderi Mınskini «daǵdarysty ádeıi ýshyqtyrdy» dep aıyptap, sanktsııa salýdy usyndy.
Belarýs prezıdenti Aleksandr Lýkashenko bul jaǵdaıǵa Batys elderin kinálap otyr, onyń aıtýynsha, batys elderi áreketiniń saldarynan adamdar elindegi soǵystan qashyp júr.