Belarýste soǵys jyldary qaza tapqan qazaqstandyq Á.Mámıevtiń jerlengen orny anyqtaldy
09:10, 10 Mamyr 2011
MINSK. 10 mamyr. QazAqparat /Aıtýar Mamlın/ - Mınsk oblysynda 1944 jyldyń 3 shildesinde «Bagratıon» shabýyldaý operatsııasy kezinde qaza tapqan qazaqstandyq Ábýjapar Mámıevtiń jerlengen jeri anyqtaldy.
Qaza tapqan azamattyń týystary men jaqyndary osy ýaqytqa deıin onyń habaryn tabýǵa tyrysyp keldi, sóıtip muraǵat aqparattaryn tyńǵylyqty zertteý barysynda qatardaǵy gvardııashy jaýynger Ábdýjapar Mámıevtiń Mınsk oblysynyń Molodechnen aýdanyndaǵy Radoshkovıchı kentindegi zıratta, baýyrlar molasynda belgisiz jaýynger retinde jerlengeni anyqtaldy.
9 mamyr - Jeńis kúni qarsańynda Mınskige kelgen bizdiń otandasymyzdyń týystary men jaqyndary Radoshkovıchı kentindegi baýyrlastar beıitinde Á.Mámıevtiń atyn qashap jazyp, onyń esimin máńgige saqtap, rýhyna taǵzym etti.