Belarýs premer-mınıstri Qazaqstanǵa jumys saparymen keledi
Premer-mınıstrdiń baspasóz hatshysy Vladıslav Sychevıchtiń habarlaýynsha, 13 tamyz, jeksenbi kúni ol QR Premer-Mınıstri Baqytjan Saǵyntaevpen kezdesedi. Júzdesý barysynda taraptar ekijaqty yntymaqtastyqqa baılanysty mańyzdy máselelerdi talqylap, ıntegratsııalyq birlestik aıasynda qarym-qatynasty talqylaıdy. Sondaı-aq, eki eldiń úkimet basshylary MadeinBelarus.Astana kórmesiniń ashylý saltanaty men qazaqstandyq-belorýstyq bıznes-forýmǵa qatysady.
Dál osy kúni Andreı Kobıakov «EKSPO-2017» mamandandyrylǵan halyqaralyq kórmesi aıasynda Belarýstyń ulttyq kúnine baılanysty ótetin saltanatty sharada bolady.
14 tamyzda, ıaǵnı dúısenbi kúni Andreı Kobıakov Eýrazııalyq úkimetaralyq keńestiń otyrysyna qatysady. Kún tártibinde 13 suraq kóterilmek. Premer-mınıstrlerge atalǵan jıynda EAEO-nyń sandyq tártibin júzege asyrý baǵytyndaǵy negizgi daıarlyqtar boıynsha atqarylyp jatqan jumystyń baıandamasy oqylatyn bolady. EAEO aıasynda taýarlardyń baqylaý mehanızmi týraly kelisimniń jobasyn talqylaý jumysyna basa mańyz beriledi. Sondaı-aq, úkimet basshylary ıntegratsııalyq birlestikke múshe elderde eńbek etetin adamdardy zeınetaqymen qamtamasyz etý boıynsha kelisimderdi talqylaıdy.
Jıyn barysynda biryńǵaı elektroenergetıkalyq naryqty qurý men úılesken kólik saıasatyn júzege asyrý sharalaryna erekshe den qoıylady. Taraptar EAEO-nyń ózge de halyqaralyq seriktesterimen saýda tártibin retke keltirý kelisimderi boıynsha keńesedi. Sondaı-aq, premer-mınıstrler «EKSPO-2017» kórmesindegi EAEO-ǵa múshe elderdiń pavılondaryn aralaýdy josparlap otyr.