Belarýs pen Qazaqstan birlesip ushqyshsyz ushý apparattaryn qurastyrady

ASTANA. QazAqparat - Belarýs pen Qazaqstan birlesip ushqyshsyz ushý apparattaryn shyǵarady. Bul týraly Belarýs premer-mınıstriniń birinshi orynbasary Aleksandr Týrchın eki eldiń saýda-ekonomıkalyq yntymaqtastyǵy jónindegi úkimetaralyq komıssııanyń otyrysynda málim etti, dep habarlaıdy QazAqparat BELTA-ǵa silteme jasap. 

«Taıaý ýaqytta Qazaqstanda belarýstik ushqyshsyz ushý apparattaryn qurastyrý boıynsha birlesken jobany júzege asyratynymyz kútiledi. IT-saladaǵy ózara yntymaqtastyqtyń qarqyny artyp, osy salada birlesken bastamalar sany artatynyna úmittenemiz», - dep atap ótti Aleksandr Týrchın.

«Ónerkásiptik kooperatsııaǵa, aýyl sharýashylyǵy men kólik salalaryndaǵy yntymaqtastyqqa basa nazar aýdara otyryp, IT, ǵarysh jáne joǵary tehnologııalar salalaryndaǵy ınvestıtsııalyq yntymaqtastyqqa serpin berý qajet dep esepteımiz», - dep atap ótti birinshi vıtse-premer.

Belarýs taraby ınfraqurylymdyq jáne ónerkásiptik birlesken jobalarǵa belsendi qatysýǵa daıyn.

«Jibek joly ekonomıkalyq beldeýiniń derbes baǵyty nemese bastamanyń bir bóligi retinde Qazaqstan-Qytaı shekarasyndaǵy «Qorǵas-Shyǵys qaqpasy» erkin ekonomıkalyq aımaǵy men «Uly tas» Qytaı-Belarýs ındýstrııalyq parkiniń áleýetin birlesip paıdalaný kerek», - dep esepteıdi Aleksandr Týrchın.

Óz kezeginde Qazaqstan Premer-Mınıstriniń birinshi orynbasary Asqar Mamın de Belarýspen óndiristik kooperatsııany keńeıtýdi qoldaıtynyn bildirdi. Onyń aıtýynsha, problemalyq jaǵdaılar talqylanǵan, endi kelisimdi tájirıbede júzege asyrý kerek. Qazaqstan Belarýspen  Qytaı-Eýropa-Qytaı baǵytyndaǵy konteınerlik tasymaldaý kólemin arttyrýǵa múddeli. Belarýs pen Qazaqstan úkimet otyrysynda 2019-2020 jyldarǵa yntymaqtastyqty damytýdyń jol kartasyna qol qoıady.