Belarýs Qorǵas arqyly Qytaıǵa óz ónimderin satpaq
«Qorǵastyń múmkindikterimen byltyr tanystyq. Keshe Qazaqstannyń usynysy boıynsha atalmysh aımaqtaǵy Belarýs respýblıkasynyń tuńǵysh saýda aımaǵyn ashyp keldik. Osy saýda kanaly arqyly biz aýyl sharýashylyǵynyń san túrli ónimderin satsaq dep otyrmyz. Ázirge sút ónimderin ótkizý boıynsha barlyq veterınarlyq, kedendik qujattardy rettep boldyq. Qytaı tarapy da bul jobaǵa qatty qyzyǵyp otyr», – dedi Belarýs Respýblıkasynyń Aýyl sharýashylyǵy jáne saýda mınıstrligi Syrtqy ekonomıkalyq qyzmet basqarmasynyń basshysy Alekseı Bogdanov forýmda.
Onyń aıtýynsha, Belarýs eliniń barlyq sút óndeýshi kásiporyndary Qytaıǵa eksporttaýshy retinde akkredıttelgen.
«Qytaımen onsyz da baılanysymyz tyǵyz. Barlyq sút óndeýshi kásiporyndarymyz akkredıttelgen. 2 et kombınaty sıyr etin ótkizýge, 5 fabrıka qus etin ótkizýge ruqsat alǵan. Keshe ǵana 7 balyq sharýashylyǵynyń Qytaı naryǵyna joly ashyldy. Qorǵas sol kásiporyndardyń ónimin ótkizetin dálizdiń bireýi bolady. Bıyl Qytaıǵa 90 mln dollardyń ónimin eksporttaý josparlanǵan. Qazaqstan úshin bul qosymsha jumys oryndary men salyq túsimderi degen sóz. Onyń ústine atalmysh saýda núktesiniń janynan Qazaqstanmen birlesip sút óńdeýshi kásiporyn ashýdy kózdep otyrmyz. Qazir sol úshin seriktes izdep jatyrmyz. Biz ol jerge shıkizat jetkizip beremiz. Al ony qazaqstandyq kásiporyn óńdep, daıyn ónim etip shyǵarýy kerek. Ol ónim eki elge ortaq brendpen qaptalyp, Qytaı naryǵyna jiberiledi», – deıdi ol.
Aıta ketsek, elordada «Qazaqstan – Belarýs bıznes forýmy» ótti. Onda belgili bolǵandaı Qazaqstan atalǵan elmen birigip aýyl sharýashylyǵy mashınalaryn jasaıdy.
Sonymen qatar, atalǵan forým aıasynda kólemi 75 mln AQSh dollaryn quraıtyn ekijaqty 15 kelisimge qol qoıyldy.