Belarýs kásipkerleri aqmolalyqtarǵa mashına jasaýdyń tyń jobasyn usynbaq
Aqmola oblysynyń ákimi Málik Myrzalın óńirge jumys saparymen kelgen Belarýs Respýblıkasynyń Ónerkásip mınıstri Vıtalıı Vovk bastaǵan bir top belarýstyq isker azamattarmen kezdesti.
Kezdesýde aımaq basshysy Aqmola oblysynyń Belarýs Respýblıkasymen dostyq qatynasy erteden bastaý alatynyn atap ótti.
«Kókshetaý qalasynda aýyl sharýashylyǵy jáne kommýnaldyq tehnıkalar shyǵaratyn Qazaqstan-Belarýs ındýstrııalyq-tehnologııalyq parki «Qazaqstandyq agro ınnovatsııalyq korporatsııasy» jaýapkershiligi shekteýli seriktestiginiń qurylýy osynyń aıqyn mysaly», - dedi Málik Myrzalın óz sózinde.
Taraptar ónerkásiptik kooperatsııany odan ári damytý, aýyl sharýashylǵy tehnıkalarynyń jańa túrlerin shyǵarý, sondaı-aq, keleshekte belarýstiń «MAZ», «MTZ», «Bobrýıskagromash», «BelAZ», «Gomselmash» tárizdi ashyq aktsıonerlik qoǵamdary shyǵaratyn avtobýstardy Aqmola oblysynda da qoldaný jáne olardy jetkizý men servıstik qyzmet kórsetý múmkindikterin talqylady.
Óz kezeginde Vıtalıı Vovk myrza da jyly qarsy alǵan aımaq basshysyna alǵysyn bildirip, ekijaqty áriptestik qatynasty damytýdyń mańyzdylyǵyna toqtaldy.
«Bizdiń Qazaqstan naryǵynda jumys istegemiz keledi. Belarýs taýarlaryn satyp qana qoımaı, osy jaqtan da shıkizat sııaqty qajetti ózimizde joq ónimderdi satyp alýǵa nıettimiz. Aqmola oblysy ónerkásiptik jáne agrarly oblys bolǵandyqtan, túrli salalar boıynsha birlesip jumys isteýge múmkindik mol. Ásirese, eki el arasynda saýda-ekonomıkalyq, kóliktik, mádenı-gýmanıtarlyq salalarda júzege asyrylmaı jatqan áleýetti jobalar bar. Onyń ishinde Aqmola oblysymen birlesip, mashına jasaý salasynda tyń jobany júzege asyrýǵa nıettimiz», - dedi Vıtalıı Vovk.
Sapar aıasynda meımandar aldymen Kókshetaý qalasynyń soltústik ónerkásip aımaǵynda jańadan qurylǵan aýyl sharýashylyǵy jáne kommýnaldyq tehnıkalar shyǵaratyn Qazaqstan-Belarýs ındýstrııalyq-tehnologııalyq parki «Qazaqstandyq agro ınnovatsııalyq korporatsııasy» jaýapkershiligi shekteýli seriktestiginde boldy. Birlesip qolǵa alynǵan jobanyń júzege asyrylý barysymen jaqyn tanysyp, odan ári damytý joldaryn qarastyrdy. Qazir traktorlardan bólek júk kólikteri men arnaıy maqsattaǵy mashınalardyń da birneshe túri shyǵarylýda.
Aıta keteıik, ótken jyl qorytyndysy boıynsha, Aqmola oblysy men Belarýs Respýblıkasy arasyndaǵy taýar aınalymy aldyńǵy jylmen salystyrǵanda eki esege ósken.