Belarýs elinde soǵysta qaza tapqan qazaqstandyq jaýyngerlerdi eske aldy

MINSK. QazAqparat - Búgin, 7 mamyrda Qazaqstannyń Belarýstegi Elshiliginiń qatysýymen Belorýs aýmaǵynda  Ekinshi dúnıejúzilik soǵysta qaza tapqan Qazaqstan jaýyngerleri eskertkishine, sondaı-aq, Mınsk oblysynyń Molodechno aýdanyndaǵy Radoshkovıchı aýylynda týys baýyrlastar qabirine gúl shoǵyn qoıý rásimi ótti, dep habarlaıdy QazAqparat  Belarýstegi Qazaqstan elshiliginiń baspasóz qyzmetine silteme jasap.

Іs-sharaǵa ardagerler, jergilikti bılik organdarynyń basshylary, qazaq dıasporasynyń ókilderi, osy eldegi qoǵamdyq jastar uıymdary, sondaı-aq, Mınskide oqyp júrgen ofıtserler, kýrsanttar men stýdentter qatysty.

Elshi Ermuhamet Ertisbaev óz sózinde Ekinshi dúnıejúzilik soǵysy jyldarynda Qazaqstannan shyqqan birneshe ondaǵan myń jaýyngerdiń qaza taýyp, Belarýste jerlengenin atap ótti. Olardyń 84-y Belorýssııany azat etý jolyndaǵy shaıqastarda erlik kórsetip, Keńes Odaǵynyń Batyry ataǵyna ıe boldy, - dedi ol.

Іs-sharanyń sońynda E.Ertisbaev belarýs halqyna qurban bolǵandardy eske saqtaǵany úshin alǵys bildirip, Qazaqstan óziniń qaharmandaryn joǵary baǵalaıtyndyǵyn atap ótti.

Soǵys ardageri, qazirgi ýaqytta Mınsk qalasynda turatyn, polkovnık Myrzataı Berikbaev is-sharanyń qurmetti qatysýshysy boldy.