Belarýs aýmaǵynda Qazaqstan azamattarynyń quqyǵyn qorǵaý tıimdiligi artpaq

NUR-SULTAN. QazAqparat - Búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy ótti. Onda senatorlar «Qazaqstan Úkimeti men Belarýs Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» zań jobasyn talqylady, dep habarlaıdy QazAqparat.

Osy kelisim memleketterge azamattardyń kóshi-qony, kóshi-qon zańnamasyn buzýshylyqtar jáne zańsyz mıgratsııa joldary, sondaı-aq elderdiń biriniń aýmaǵynda bolý úshin negizder bar tulǵalardyń quqyqtyq mártebesi týraly aqparattar almasýǵa múmkindik beredi.

«Resmı statıstıkaǵa súıensek, 2019 jyly Qazaqstanǵa Belarýstyń 32 myńǵa jýyq azamaty kirgen. Onyń ishinde 76-sy ákimshilik jaýapkershilikke tartylǵan. Búgin qaralyp otyrǵan kelisimniń mańyzy zor. Bul qujatta aqparattar men málimetter almasý túrleri, azamattardyń sanattary jáne yntymaqtastyqty nyǵaıtý nysandary men negizgi baǵyttary naqty kórsetilgen. Eki eldiń kóshi-qon máselelerinde ózara árkettesetin quziretti organdary da anyqtalǵan. Qazaqstanda ol – Іshki ister mınıstrligi men Eńbek jáne halyqty áleýmettik qorǵaý mınıstrligi», – dedi senator Rysqalı Ábdikerov.

Kelisim eki memlekettiń zańdaryna jáne halyqaralyq mindettemelerine sáıkes Belarýs aýmaǵyndaǵy Qazaqstan azamattarynyń quqyqtaryn qorǵaýdyń tıimdiligin arttyrýǵa yqpal etedi.