Belarýs ártisteri «Astana Operada» óner kórsetedi
Balettiń qoıýshy baletmeısterler - Qazaqstannyń eńbek sińirgen qaıratkerleri Tursynbek Nurqalıev jáne Ǵalııa Bóribaeva. Qoıýshy dırıjeri - Qazaqstannyń eńbek sińirgen qaıratkeri Aıdar Ábjahanov.
Odetta-Odıllııa partııasyn ıAna Shtangeı oryndaıdy. Ol klassıkalyq bı tehnıkasyn óte jaqsy meńgergen.
Oǵan jeńil ári joǵary sekirý máneri, názik ári jigerli bı tán. Klassıkalyq repertýardaǵy partııalardy oryndaý kezinde balerına sahnalyq obrazdar men stılıstıkalyq dáldiktiń psıhologııalyq tereńdigin kórsetýge umtylady.
- Menińshe, jan-jaqty damyǵan adamda kez-kelgen partııa qyzyqty shyǵady, óıtkeni spektaklge kitap, fılmderden ıdeıalar engizýge bolady. Eki jyl buryn «Aqqý kóli» baletinde bıleý alǵash ret usynylǵanda, bul men úshin kútpegen sát edi. Men bul spektaklden qatty qoryqtym, óıtkeni ol - «taza klassıka», eshqandaı qatelikti keshirmeıdi. Árqashan osy partııa aldynda keremet bir jaýapkershilikti sezinemin. Jáne árbir kelesi spektaklge jańalyq engizýge tyrysamyn. Ómirde men óte ustamdy adammyn, biraq sahnaǵa shyqqan kezde, meniń barlyq emotsııam shyǵady, - dep atap ótti ıAna Shtangeı.
Onyń sahnalyq seriktesi, Zıgfrıd partııasyn oryndaýshy Egor Azarkevıch mánerli ıkemdiligimen, akterlyq talantymen, náziktigi jáne talǵampazdyǵymen erekshelenetin sheberligimen áıgili. Ártis óziniń bı tehnıkasy men akterlyq sheberligin jetildirýde kóp eńbek etedi, árbir sahnalyq beınesin somdaýǵa erekshe baıyptylyqpen qaraıdy.
- Hanzadalar partııasyn aıtarlyqtaı jıi oryndaımyn, kóp jaǵdaıda bul aǵymdaǵy repertýarǵa baılanysty. Zıgfrıd rólin óte jaqsy kóremin, Horeografııalyq kolledjdi bitirgen kezden bastap, ol meni ózimen birge alyp kele jatyr: osy spektakldegi pa-de-deni men esep bergen kontsertimde bıledim. Ózimniń romantıkalyq qaharmanym arqyly men onyń ishki álemin tolyqtyratyn sezimderdi - náziktikti, mahabbat pen erlikti bildire alamyn, - dep atap ótti Egor Azarkevıch.
«Aqqý kóliniń» negizinde - folklorlyq ertegi áleminde keń taraǵan zulym sıqyrdyń kúshimen qusqa aınalǵan arý týraly tarıh jatyr. P. Chaıkovskıı baletinde Zıgfrıd hanzada Odettanyń qutqarýshysy, alaıda onyń baıqaýsyz jasaǵan opasyzdyǵy qasiretti kúnáge aınalady. Hanzada saraıyndaǵy bal keshine názik Odettaǵa óte uqsas, biraq zulym ári eliktirgish Odıllııa keledi. Alaıda, jiberilgen qateligin túsingen ol, zulym danyshpan Rotbartqa qarsy kúreste óziniń mahabbatyn qorǵaıdy. Atalǵan partııany alǵash ret «Astana Opera» teatrynyń jetekshi solısi, Qazaqstannyń eńbek sińirgen qaıratkeri Taıyr Ǵataýov somdaıdy. Saıqymazaq rólinde - Erkinbek Áýbákirov.