Belarýs aqparattyq tehnologııalardy qalaı damytyp otyr

ASTANA. QazAqparat - Smart Satu saıtynyń negizin qalaýshy Bolatbek Ospanov aqparattyq tehnologııalardy damytýǵa qatysty óz keńesin berdi. Búginde onyń jobasy taýar óndirýshiler men satyp alýshylar úshin tikeleı baılanysty ornatýǵa múmkindik berip otyr. Kompanııa Qazaqstan naryǵynda jumys istese de, keńsesi Belarýstyń Mınsk qalasynda ornalasqan,  dep habarlaıdy QazAqparat tilshisi.

«Belarýsta aqparattyq tehnologııalardy damytý úshin qolaıly ári tıimdi jaǵdaılar jasalady. Alaıda ol jerde ázirlenetin jobalardyń 95 protsenti Eýropa men AQSh-qa ketedi. Árıne, eldiń tsıfrlanýyna da kóńil bólinedi. Ol jaqta aqparattyq tehnologııalardy jasap, aqsha tartýǵa tyrysady. Biz bolsaq, aqsha kóp bolǵannan keıin, kerisinshe, tehnologııalardy shetelden tartyp jatamyz», - deıdi B.Ospanov.

Onyń aıtýynsha, kompanııa Mınsk qalasyndaǵy joǵary tehnologııalar parkiniń rezıdenti bolǵannan keıin memleket tarapynan jeńildikter ala bastady. «Bizdi san alýan kórmelerge shaqyrady. Qoldaıdy, halyqqa tanystyrady. Al qarjylaı jeńildikterge keler bolsaq, joǵary tehnologııalar parkiniń rezıdenti bolǵanǵa deıin biz jalaqyǵa ketetin aqshanyń 50 protsentin salyq retinde tóledik. Máselen, 3000 dollar jalaqyǵa bersek, 1 500 dollardy salyqqa saldyq. Qazir ol salyqtyń kólemi nebary 9 protsentti qurap otyr. Sosyn kompanııalar tabystyń 1 protsentin parkke tóleıdi. Máselen, qandaı da bir jobany 1 mlrd dollarǵa satyp, ol aqsha elge kelse, 10 mln dollar parktiń bıýdjetine túsedi. Ol aqsha parkti damytýǵa salynady, mamandardyń biliktiligin arttyrýǵa jumsalady», - dep atap kórsetti B.Ospanov.

Onyń sózine qaraǵanda, Qazaqstanda bilikti mamandar bar. Biraq olardy ustap turatyn orta joq. Sol sebepti kóbisi shetelge ketip jatady. Al iri halyqaralyq kompanııalar óz jerimizde jumys istep, jaqsy jalaqy tólese, kásibı mamandardy ustap qalýǵa bolatyn edi. Bir sózben aıtqanda, orta qajet. Ortanyń jasaı almasaq, qansha mamandy oqytsaq ta, sonsha maman Eýropa men AQSh-qa kete beredi. «Máselen, Belarýs «Joǵary tehnologııalar parki 2.0» atty dekretti shyǵarǵannan keıin ol jerde aı saıyn 50 kompanııa ashylady. Barlyǵy joǵary tehnologııalar parkiniń rezıdenti bolýǵa tyrysady. Sebebi ol jerde IT mamandar kóp. Jańadan keletin kompanııalar Qazaqstan, Ózbekstan, Tájikstan, Qyrǵyzstan men Reseıde júrgen myqty mamandardy jınap alady da, óz jobalaryn jasaıdy. Mamandar barady. Sebebi olarǵa áldeqaıda kóp jalaqy tóleıdi», - deıdi B.Ospanov. Mamannyń oıynsha, búginde aqparattyq tehnologııalar boıynsha bilim berýge negizgi basymdyq berý kerek. Sosyn sheshim qabyldaýdy barynsha jeńildetken jón. Óıtkeni bir usynys barlyq mınıstrlikterdiń qaraýynan ótkenshe biraz ýaqyt ketedi. Al ol ýaqyttyń ishinde kóp nárse ózgeredi.