Belgııalyqtar gaz ben elektr energııasyn barynsha únemdi paıdalanýda
Osy jyly Belgııa turǵyndarynyń gaz tutynýy ótken jyldyń sáıkes kezeńimen salystyrǵanda 14%-ǵa azaıdy. Elektr energııasy úshin bul kórsetkish 12%-ǵa tómendedi. Flandrııadaǵy «Fluvius» jelilik operatorynyń derekteri energııa baǵasynyń joǵarylaýy úı sharýashylyqtaryna óte sýyq, aıazdy kúnderde de elektr energııasyn tutynýdy azaıtýǵa májbúr etetinin kórsetedi.
Energııa baǵasy elde 2021 jyldyń sońynda óse bastady. Reseıden gaz ımportyn shekteý suranysqa qosymsha qysym túsirdi. Energetıkalyq operatordyń taldaýy kórsetkendeı, aýa raıynyń sýyq bolǵanyna qaramastan, jekelegen abonentter jylytý júıeleriniń temperatýrasyn tómendetken. Keıbir adamdar endi barlyq bólmeni jylýǵa qosýdan bas tartqan. Osylaısha, kún batareıalary joq úı sharýashylyqtary arasynda elektr energııasyn tutyný 11,5%-ǵa tómendegen. Kún panelderi bar úı sharýashylyqtary 13,5 %-ǵa únemdegen.
«Fluvius» kompanııasynyń paıymdaýynsha, bul úı sharýashylyqtarynda jylý sorǵylary men elektromobılder sııaqty elektr energııasyn kóbirek tutynatyn qurylǵylardyń kóp bolýymen baılanysty. Qazirgi ýaqytta Belgııada kún raıy jylyndy, bul turǵyndarǵa jylýdy odan da kóp únemdeýge múmkindik beredi.
Foto: Fotolia / Jenifoto