Belgııada maımyl sheshegin juqtyrýdyń 6 deregi tirkeldi

BRıÝSSELЬ. QazAqparat - Seısenbide Belgııada maımyl sheshegi vırýsyn juqtyrýdyń 6 jaǵdaıy rastaldy, al taǵy 1 yqtımal jaǵdaı PTR-testileý nátıjelerin kútýde, dep habarlaıdy QazAqparat menshikti tilshisi.

22 mamyrda Belgııada 4 derek tirkelgen. Sonymen qatar, juqtyrǵandardyń barlyǵy osy aıdyń basynda Antverpen qalasynda ótken festıvalǵa qatysqan.

Belgııanyń federaldy densaýlyq saqtaý agenttigi Sciensano epıdemıologııalyq jaǵdaı muqııat baqylaýda ekenin aıtady. Óıtkeni Táýekelderdi baǵalaý toby (RAG) kúdikti jaǵdaılar men rastalǵan derekterge qatysty usynystarmen jumys istep jatyr.

Sciensano densaýlyq saqtaý mamandaryna arnalǵan veb-saıtynda qosymsha aqparattar usynyp otyrady, al jalpy jurtshylyqqa arnalǵan aqparattar Kútim jáne densaýlyq saqtaý agenttiginiń veb-saıtynan tabylady.

Vırýs anyqtalǵan naýqastar 21 kún oqshaýlanýy kerek.

Sarapshylar maımyl shesheginiń Covid-19-dan birneshe aıyrmashylyǵy bolǵandyqtan, bul vırýstyń arty pandemııaǵa ulasýy ekitalaı ekenin alǵa tartady.