Belgııa úkimeti meıramhanalar men qonaqúılerdiń jumysy qashan jandanatynyn habarlady

BRıÝSSELЬ. QazAqparat – Juma kúni Belgııanyń koronavırýsqa qarsy kúres konsýltatıvtik keńesiniń otyrysy ótip, karantın erejelerin jeńildetý strategııasy qabyldandy, dep habarlaıdy QazAqparattyń menshikti tilshisi.

«Belgııa koronavırýsqa qarsy kúrestiń keıbir sharalaryn resmı túrde jeńildetip, keı sektorlardyń jumysyna basymdyq berdi», - dep málimdedi premer-mınıstr Aleksandr De Kroo baspasóz máslıhaty kezinde.

Mınıstrler kabıneti basshysy eldegi epıdemıologııalyq jaǵdaı baqylaýda bolsa ǵana mundaı jeńildetý sharalary júzege asatynyn atap ótti.

Osylaısha, 8 naýryzdan bastap belgııalyqtar ashyq aspan astynda 10 adamǵa deıin jınala alady. Jerleý rásimine 50 adamǵa deıin qatysýǵa ruqsat etiledi.

13 jasqa deıingi balalarǵa ashyq aspan astynda 25 balaǵa deıin, jabyq ǵımarat ishinde 10 balaǵa deıin qatysa alatyn is-sharalar uıymdastyrýǵa bolady.

15 naýryzdan bastap Belgııa joǵary oqý oryndarynyń stýdentteri aptasyna bir kún sabaqqa baryp, qatysa alady.

Sáýirden bastap ashyq aspan astynda 50 adamǵa deıin qatysatyn dinı qyzmetterdi ótkizýge bolady. Biraq maska taǵý men áleýmettik qashyqtyq saqtaý mindetteledi.

Qonaqúı men meıramhanalar tek 1 mamyrdan bastap ashylady. Ashylý qatań tártippen ótedi, onyń ishinde koronavırýstyń bar-joǵyn anyqtaıtyn jedel test tapsyrý da bar. Qalpyna keltirý jumystarynyń basqa da tustaryn úkimet jaqyn arada tolyqtyrady.