Belgııa men Nıderlandta koronavırýs qaıta órshidi

BRıÝSSELЬ. QazAqparat – Belgııa men Nıderlandta koronavırýs juqtyrý jaǵdaılarynyń sany artyp keledi. Jergilikti sarapshylar COVID-19 vırýsynyń «kúzgi tolqyny» týraly eskertip otyr, dep habarlaıdy QazAqparat.

Nıderlandtyń RIVM densaýlyq ınstıtýty sońǵy aptada elde oń synama, aýrýhanaǵa jatqyzý jáne ınfektsııanyń negizgi deńgeıiniń joǵarylaǵanyn atap ótti.

Osylaısha, Nıderlandyda ótken aptada COVID-19 vırýsyn juqtyrýdyń 12 269 jaǵdaıy tirkeldi. Bul – bıylǵy 13 tamyzdan bergi eń joǵary jáne ótken aptamen salystyrǵanda 39% joǵary kórsetkish.

Kórshiles Belgııada da koronavırýs pandemııasy qaıtadan qarqyn alǵan. Ótken aptada aldyńǵy jeti kúnmen salystyrǵanda juqtyrýdyń jańa jaǵdaılary 21%-ǵa kóbeıgen.

Reprodýktıvti kórsetkish 1,23-ke deıin kóterildi, bul da ótken aptamen salystyrǵanda úshten bir ese kóp.

17 men 23 qyrkúıek aralyǵynda kún saıyn 2 232 adamnyń vırýsqa shaldyqqany anyqtaldy.

Sońǵy jeti kúnde Belgııa aýrýhanalaryna koronavırýs dıagnozy qoıylǵan 73 naýqas túsken, bul aldyńǵy aptamen salystyrǵanda 41% kóp.

Qazir el aýrýhanalarynda koronavırýstan 925 adam em alýda. Bul ótken kezeńmen salystyrǵanda 35%-ǵa kóp.

«Qazirgi kezeńde aýrý juqtyrý sanynyń kúrt ósýine jol bermeý úshin vaktsınatsııa men testileý óte mańyzdy», - dep atap ótti RIVM ınstıtýtynyń sarapshylary.

«Tsıfrlar vırýs juqtyrǵandardyń naqty sanyn kórsetpeıdi, óıtkeni qazirgi ýaqytta testileý ortalyqtarynda tek medıtsına qyzmetkerleri, ózin-ózi teksere almaıtyn adamdar jáne koronavırýs anyqtamasyn qajet etetin adamdar ǵana tekserilýde. Aýrýhanaǵa jatqyzý sany da artyp keledi», - dep qosty sarapshylar.