Belgııa qatań lokdaýndy uzartty

BRıÝSSELЬ. QazAqparat – Belgııadaǵy qatań karantın tártibi taǵy eki aptaǵa uzartyldy, dep habarlaıdy QazAqparattyń menshikti tilshisi.

Juma kúni Brıýsselde el úkimeti janyndaǵy konsýltatıvtik komıtettiń otyrysy ótip, qazirgi epıdemıologııalyq jaǵdaı talqylandy.

COVID-19 juqtyrǵandar sany azaıǵanyna qaramastan, Belgııa úkimeti karantın tártibin jeńildetýge áli erte degen sheshimge kelip, oqshaýlaný erejesin 2021 jyldyń 22 qańtaryna deıin uzartty.

Sarapshylardyń aıtýynsha, «rojdestvo demalystarynan» kelgen saıahatshylar men mektepterdegi sabaqtyń jandanýy koronavırýstyń órshýine ákep soǵýy múmkin.

Sondaı-aq bılik ókilderi mekemelerdegi qashyqtan jumys isteý erejelerin tekseredi. Múmkindiginshe saparǵa shyqpaýǵa keńes beriledi, al «qyzyl aımaqtan» oralǵandar qosymsha tekseristen ótip, oqshaýlanýy kerek.

Sonymen qatar konsýltatıvtik komıtet sarapshylar tobyna júginip, barlyq salalardyń jumysyn jandandyrý kestesin quryp, qaı jerde qatań jumys hattamasy kerek ekenin kórsetýdi surady.

Sondaı-aq ony «múmkindiginshe tez ári tıimdi» jasaýdy ótindi.

Belgııa úkimeti janyndaǵy Konsýltatıvtik komıtettiń kelesi otyrysy 2021 jyldyń 22 qańtaryna josparlanǵan.