Bektenov jaıly mektep qurylysy týraly: Jumys tásili ózgermese, jaýapty tulǵalarǵa qatań shara qoldanylady
«Memleket basshysynyń jańa formattaǵy mektepter salý týraly tapsyrmasyn oryndaý úshin biz bar kúshimizdi jumyldyryp, tez qımyldaýymyz kerek. Osyǵan baılanysty atalǵan jumysqa tartylǵan barlyq memlekettik organnan naqty is-qımyldardy talap etemin. Birinshi, «Samuryq-Qazyna» qoryna 1 qyrkúıekke deıin 98 mekteptiń, al osy jyldyń sońyna deıin qalǵan 119 mekteptiń paıdalanýǵa berilýin qamtamasyz etýdi tapsyramyn. Merzimderdiń buzylýyna eshqandaı jol berýge bolmaıdy. Bul rette, jumystardyń sapasy aqsamaýy tıis», - dedi Úkimet basshysy.
Premer-Mınıstr 15 mamyrǵa deıin barlyq jobalaý-smetalyq qujattamany ázirleýdi jáne memlekettik saraptamadan ótkizýdi aıaqtaý qajettigin basa aıtty.
«Ekinshi. Óńir ákimderi 15 naýryzǵa deıin mektep qurylysyna arnalǵan jer ýchaskelerin rásimdeýge qatysty barlyq problemany sheshýi tıis. Bıyl paıdalanýǵa beriletin mektepterge baratyn joldar men ınjenerlik-kommýnıkatsııalyq ınfraqurylymnyń qurylysyn osy jylǵy 1 tamyzǵa deıin aıaqtaý qajet. Astana jáne Almaty ákimderi 15 jeltoqsanǵa deıingi merzimde ınvestorlardan satyp alynatyn 9 mektepti paıdalanýǵa berýdi qamtamasyz etsin», - dedi Oljas Bektenov.
Úkimet basshysy úshinshiden, Oqý-aǵartý mınıstrligi Ǵylym jáne joǵary bilim mınıstrligimen birlesip, salynyp jatqan mektepterdi aldyn ala pedagog kadrlarmen qamtamasyz etý tıistigin aıryqsha atap ótti.
«Obektiler ashylǵannan keıin birden naqty josparly oqý protsesin uıymdastyrý qajet. Tsıfrlandyrý mınıstrligi mektepterdi sapaly ınternetpen qamtamasyz etsin. Іshki ister jáne Oqý-aǵartý mınıstrlikteri jaıly mektepterdiń, onyń ishinde irgeles jatqan aýmaqtardyń qaýipsizdigi máselesin erekshe baqylaýǵa alýy qajet. Biz ulttyq jobany iske asyrý barysyn maýsym aıynda qaıta qaraımyz. Eger jumys tásili ózgermese, jaýapty tulǵalarǵa qatań sharalar qoldanylatyn bolady», - dedi Oljas Bektenov.