Bektenov japondyq JBIC bankiniń tóraǵasymen ınvestıtsııalyq yntymaqtastyqty keńeıtý perspektıvalaryn talqylady

<p><strong>ASTANA. KAZINFORM &ndash; Qazaqstan Premer-Mınıstri Oljas Bektenov JBIC (Japan Bank for International Cooperation) Japonııa halyqaralyq yntymaqtastyq bankiniń tóraǵasy Haıaşı Nobýmıtsýmen kezdesti. Qarjy salasyndaǵy yntymaqtastyqty keńeıtý jáne birlesken ınvestıtsııalyq jobalardy iske asyrý máseleleri talqylandy.&nbsp;</strong></p>

Japonııa Qazaqstannyń Shyǵys Azııadaǵy negizgi seriktesteriniń biri ári búginde úzdik-10 iri ınvestorlar qataryna kiredi. Qazaqstan men Japonııa arasyndaǵy taýar aınalymy ótken jyly 10,5%-ǵa ósip, $2,1 mlrd-qa jetti. Bıylǵy qańtar-mamyr aılarynda ózara saýda kórsetkishi $768 mln-dy qurady. 1993 jyldan beri Japonııanyń Qazaqstan ekonomıkasyna kapıtal salymdarynyń jınaqtalǵan kólemi shamamen $8 mlrd-qa jetti.

Foto: QR Úkimeti

Úkimet basshysy JBIC-tiń eki el arasyndaǵy saýda-ekonomıkalyq qatynastardy damytýǵa qosqan eleýli úlesin atap ótti. JBIC Japonııa halyqaralyq yntymaqtastyq banki Qazaqstanda energııamen jáne sýmen jabdyqtaý, taý-ken ónerkásibi, sondaı-aq kólik-logıstıka salalarynda quny $2,3 mlrd bolatyn 26 jobany iske asyrýdy qarjylandyrdy. Qazaqstannyń Damý bankimen birlesip energetıka (JEK qosa alǵanda), kólik salasy, mashına jasaý, azyq-túlik ónerkásibi jáne basqa da basym salalardaǵy birlesken jobalardy $200 mln somasyna qarjylandyrý nıeti boıynsha kelisimge qol qoıý josparlanyp otyr. 

«Japonııanyń ońtústiginde oryn alǵan jer silkinisine baılanysty habardy ókinishpen qabyldadym. Eń bastysy, adamdar aman bolyp, tabıǵı apat aýqymdy shyǵyndarǵa alyp kelmeıdi dep úmittenemin. Japonııa – bizdiń negizgi saýda-ekonomıkalyq ári ınvestıtsııalyq seriktesimiz. Búginde qazaq-japon qatynasy keńeıtilgen strategııalyq áriptestik rýhynda damyp keledi. Qazaqstan Úkimeti yntymaqtastyq kókjıegin keńeıtý nıetin quptaıdy jáne birlesken jobalardy iske asyrýda qajetti qoldaý kórsetýge daıyn», - dep atap ótti Oljas Bektenov. 

Foto: Rrimeminister.kz

Óz kezeginde JBIC tóraǵasy Haıaşı Nobýmıtsý ESG (Environment, Sustainability, Governance) sheńberinde «jasyl» qarjy jáne tranzıttik qarjylandyrý salasyndaǵy birlesken ınvestıtsııalyq jobalardy iske asyrýǵa múddeli ekenin atap ótti.

Kezdesý qorytyndysy boıynsha taraptar barlyq perspektıvaly baǵyttar boıynsha yntymaqtastyqty nyǵaıtýǵa jáne keńeıtýge nıet bildirdi.