Bektenov jańa ulttyq ekonomıka mınıstrin tanystyrdy

<p>ASTANA. KAZINFORM &mdash; Premer-mınıstr Oljas Bektenov Ulttyq ekonomıka mınıstrligi ujymyna vedomstvonyń jańa basshysy Serik Jumanǵarındi tanystyrdy.&nbsp;</p>

Oljas Bektenov Nurlan Baıbazarovqa vıtse-premer – ulttyq ekonomıka mınıstri retinde atqarǵan jumystary úshin alǵysyn bildirip, aldaǵy qyzmetine tabys tiledi.

Serik Jumanǵarındi tanystarý barysynda Premer-mınıstr vedomstvonyń aldaǵy kezeńge arnalǵan basym mindeti – Memleket basshysynyń ekonomıkanyń serpindi ósimin qamtamasyz etý jónindegi tapsyrmasyn oryndaý ekenin basa aıtty.

Búgingi tańda ekonomıka turaqty ósý úrdisin kórsetip otyr. Ekonomıkany qurylymdyq ózgertý, bıýdjet, salyq saıasatynyń tıimdiligi men bıýdjettik parametrlerdi boljaý deńgeıin arttyrý jumystaryn kúsheıtý tapsyryldy.

Budan basqa, basym salalardaǵy ekonomıkalyq ósýdi qamtamasyz etý úshin Ulttyq ekonomıka mınıstrligi bıznesti qoldaýdyń teńgerimdi saıasatyn jáne tarıftik retteýdiń salmaqty saıasatyn júrgizýi qajet.

Buǵan deıin Memleket basshysynyń Jarlyǵymen Nurlan Serikuly Baıbazarov Qazaqstan Respýblıkasy Premer-Mınıstriniń orynbasary — Ulttyq ekonomıka mınıstri laýazymynan bosatylǵan edi.

Onyń ornyna Serik Jumanǵarın Ulttyq ekonomıka mınıstri atanǵany habarlandy.