Bektenov oblys ákimderine aýyldaǵy medıtsınalyq nysandardyń qurylysyn shıratýdy tapsyrdy
«Aýyl medıtsınasy jańa medıtsınalyq mekemeler men bilikti mamandarǵa muqtaj. Sondyqtan aýylda densaýlyq saqtaýdy jańǵyrtý ulttyq jobasyn sapaly iske asyrý bizdiń aldymyzda turǵan basty mindetterdiń biri. Ulttyq jobany iske asý barysyn biz aqpan aıynda qaraǵanbyz. Ol kezde bekitilgen kesteden birshama artta qalý baıqalǵan bolatyn. Soǵan sáıkes tapsyrmalar berilgen. Búgin kórip otyrǵanymyzdaı, aýqymdy jumys júrgizilgen. Jobalaý-smetalyq qujattardyń bárine memlekettik saraptama qorytyndysy tolyqtaı berilgen. Merdiger kompanııalar aıqyndalyp, qurylys-montajdaý jumystary júrgizilip jatyr», - dedi ol.
Aıtýynsha, Úkimet ulttyq jobany iske asyrýǵa 60,3 mlrd teńge bólgen.
«Onyń 21 mlrd teńgeden astam bóligin óńirler alyp úlgerdi. Qazir qalǵan nysandardy qarjylandyrý máselesi pysyqtalyp jatyr. Ákimdikter barsha nysandardyń qurylysyn ýaqtyly ári sapaly júrgizý úshin kúndelikti baqylaýdy kúsheıtý kerek. Qaraǵandy, Aqtóbe, Pavlodar, batys Qazaqstan jáne Jetisý oblystary ákimderiniń nazaryn osyǵan aýdarǵym keledi. Qurylys maýsymy ásirese soltústiktegi óńirlerde tez aıaqtalatynyn eskerý kerek. Barlyq nysandar belgilengen merzimde paıdalanýǵa berilýge tıis. Bul rette qurylys jumystarynyń normatıvtik talaptardy saqtaýyn da qamtamasyz etý kerek», - dedi Úkimet basshysy.